टोमराज मेहता
सुनसरी । सुनसरीको भोक्राहा नरसिंह गाउँपालिकाका चार सय जना अपाङ्गता भएका व्यक्तिहरुलाई कम्मल र झुल वितरण गरिएको छ । नेपाली कांग्रेस प्रदेश क्षेत्रीय कार्यसमिति क्षेत्र नम्बर ४ (ख) सुनसरीको आयोजनामा भोक्राहा नरसिंह गाउँपालिकाका चार सय अपाङ्गता भएका व्यक्तिहरुलाई कम्मल र झुल वितरण गरिएको हो ।
पूर्व अर्थमन्त्री तथा नेपाली कांग्रेसका केन्द्रीय सदस्य ज्ञानेन्द्रबहादुर कार्कीले अपाङ्गता भएका व्यक्तिहरुलाई आत्मनिर्भर बनाउन र प्राविधिक शिक्षा प्रदान गर्नमा आफनो भूमिका रहने बताएका छन् ।
पूर्व अर्थमन्त्री कार्कीले सुनसरी क्षेत्र नम्बर ४ बाट सांसद भएकाले आफ्नो क्षेत्रका जनताप्रतिको माया, प्रेम बढ्दै गएकाले यस क्षेत्रको विकाससँगै अपाङ्गता भएका व्यक्तिहरुको समस्याप्रति उति नै चासो राखेर कम्मल र झुल वितरण गरेको बताए ।
सो वितरण कार्यक्रममा अपाङ्गता भएका साकिर आलम कानुन संकायमा अध्ययनरत रहेको र उनको आर्थिक अवस्था कमजोर भएकाले आलमलाई शिक्षाबाट बञ्चित नहुनका लागि ५० हजारको छात्रवृत्ति उपलब्ध गराउने घोषणा गरेका छन् ।
अपाङ्गता भएका व्यक्तिहरु पनि समाजका अङ्ग भएकाले उनीहरुलाई शिक्षा, स्वास्थ्य र आत्मनिर्भर बन्नका लागि आफूले पहल र प्रयास गर्ने कार्कीले प्रतिवद्धता व्यक्त गरेका छन् ।
‘अपाङ्गता भएका व्यक्तिहरुको आवाज सुन्नुपर्छ,’ उनले भने, ‘राज्यले सुनेर मात्र हुँदैन, राज्यले सेवा सुविधा पनि प्रदान गर्नुपर्दछ । अपाङ्गता भएका व्यक्तिहरुका लागि आफूले गर्ने प्रयत्न गर्न तयार छु ।
’ अपाङ्गता भएका व्यक्तिहरुको जीवन सुगम बनाउन, भविष्यलाई उज्ज्वल बनाउनका निमित्त सबैले प्रयत्न गर्न आवश्यक रहेको र आफूबाट पनि हुने सहयोग गर्न तयार रहेको उनले बताए । नेपाली कांग्रेसले सबैको भलो चिताउने काम गर्दै आएकाले आगामी दिनमा उनीहरुको प्रतिभा, कला, लोकप्रियता र रुचिअनुुसार सुनसरी जिल्लामा अवसर प्रदान गर्ने कार्कीको भनाइ छ ।
अपाङ्गता भएका व्यक्तिहरुले सेवा सुविधा पाउने विश्वासका साथ उनीहरुको उत्साहले समाजमा योगदान पुग्ने भएकाले नेपाली कांग्रेसले उच्च सम्मान गर्नेसमेत उनले बताए ।
कम्मल तथा झुल वितरण कार्यक्रममा एक सयभन्दा बढी अपाङ्गता भएका व्यक्तिहरु नेपाली कांग्रेसमा प्रवेश गरेका छन् । अरु पार्टीले अपाङ्गता भएका व्यक्तिहरुलाई कुनै अवसर प्रदान नगरेको, मागअनुसार कुनै काम नगरिदिएको र अपाङ्गता भएका व्यक्तिहरुलाई हेर्ने दृष्टिकोण फरक रहेकाले आफूहरुको भलो चिताउने र अवसर प्रदान गर्ने नेपाली कांग्रेस पार्टी भएकाले प्रवेश गरेको नवप्रवेशीहरुले बताएका छन् ।
नवप्रवेशीहरुलाई टिका लगाएर पूर्व अर्थमन्त्री कार्कीले स्वागत गरेका थिए । भोक्राहा नरसिंह गाउँपालिकाका अपाङ्गता भएका व्यक्तिहरुको रोजाइ पनि नेपाली कांग्रेस बन्न थालेको छ । नेपाली कांग्रेसमा यसअघि पनि विभिन्न पार्टी परित्याग प्रवेश गरेका थिए ।
अब सर्वसाधारणको मात्र होइन् अपाङ्गता भएको व्यक्तिहरुका लागि पनि लोकप्रिय पार्टी कांग्रेस बनेको छ । यद्यपि नेपाली कांग्रेसका केन्द्रीय सदस्य तथा सुनसरी क्षेत्र नम्बर ४ का निवर्तमान सांसद कार्कीले गरेको गतिविधिहरुबाट खुसी भएर कांग्रेस प्रवेशको लहर दिनप्रतिदिन बढ्दो रहेको पाइएको छ ।
नेपाली कांग्रेस प्रदेश क्षेत्रीय कार्यसमिति क्षेत्र नम्बर ४ (ख) सभापति हारुण अन्सारीको अध्यक्षतामा सम्पन्न भएको छ । पूर्व अर्थमन्त्री ज्ञानेन्द्रबहादुर कार्की, रविना राणा कार्की, नेपाली कांग्रेस सुनसरीका सभापति तथा प्रदेश नम्बर १ का प्रमुख प्रतिपक्षी दलका नेता राजीव कोइराला, इनरुवा नगरपालिकाका मेयर राजन मेहताले अपाङ्गता भएका व्यक्तिहरुलाई कम्मल र झुल वितरण गरेका थिए ।
त्यसैगरी सुनसरी कांग्रेसका सचिव केदार भण्डारी, सुनसरी क्षेत्र नम्बर ४ का सभापति तथा कोशी गाउँपालिकाका अध्यक्ष ऐयुब अन्सारी, क्षेत्रीय सहसभापति सदानन्द मण्डल, नेपाल मुस्लिम संघ प्रदेश नम्बर १ का अध्यक्ष हाजी डा. इसराइल मन्सुरी, नेपाली कांग्रेस सुनसरी क्षेत्र नम्बर ४ का सचिव राजेन्द्रप्रसाद मेहतालगायतले कम्मल र झुल वितरण गरेका थिए ।
