बालअधिकारका लागि पाँच बुँदे प्रतिबद्धता

जिल्लाका स्थानीय तहहरुले बालमैत्री बनाउन आवश्यक रहेकाले अगामी दिनमा जारी गरिएको घोषणापत्र अनुसार काम गर्ने प्रतिबद्धतासमेत जनाएका छन् । बालमैत्रीका विषयमा छलफल र बहसबाट बालअधिकार सुनिश्चिताका लागि पाँच बुँदे प्रतिबद्धतापत्रले सहयोग गर्नेसमेत सहभागीहरुले बताएका छन् ।

बालअधिकार सुनिश्चितताका लागि संघीय, प्रदेश र स्थानीय सरकार तथा सरोकारवालाबीच आपसी समझदारी, समन्वय, सहकार्य गर्ने, स्थानीय तहमा बालबालिकासम्बन्धी कार्यविधि, नीति नियम, रणनीति योजना बनाई कार्यान्वयन गर्ने, स्थानीय तहमा बालअधिकार सुनिश्चितताका लागि बालबालिकासम्बन्धी ऐनले व्यवस्था गरेको प्रावधानलाई प्रभावकारी बनाउने, नेपालको संविधानले प्रदत्त गरेको बालअधिकारको सम्मान गर्दै पुस २८ गते विराटनगरमा भएको बालअधिकार सुनिश्चितताका लागि प्रदेशस्तरीय छलफलबाट पारित भएको ११ बुँदे घोषणापत्र कार्यान्वयन गर्ने र बाल अधिकारको संरक्षण र प्रबद्र्धनका लागि प्राविधिक सहयोग मानव अधिकार मञ्च नेपाल, दूरदृष्टि विकास समाज केन्द्रका साथै बालबालिकासम्बन्धी काम गर्ने गैर सरकारी समन्वय समितिहरुले गर्ने पाँच बुँदे प्रतिबद्धतापत्र घोषणा गरेको दायालाल चौधरीले बताएका छन् ।

जिल्ला समन्वय समितिकी उपप्रमुख कृष्णकुमारी विश्वकर्माको अध्यक्षतामा जिल्लास्तरीय छलफल कार्यक्रम सम्पन्न भएको थियो । कार्यक्रममा रामधुनी नगरपालिकाका प्रमुख जयप्रकाश चौधरी, गढी गाउँपालिकाकी उपाध्यक्ष राजकुमारी चौधरी, गैसस महासंघ नेपाल सुनसरीका विनोद विश्वकर्मा, बराहक्षेत्र नगरपालिकाकाका अरुण मेहता, अधिकृत काशी पोखरेल, राष्ट्रिय बालअधिकार परिषदका सुमन अधिकारी, मानव अधिकार मञ्च नेपालका देवेन्द्र विश्वकर्मा, अस्मिता मगर, दूरदृष्टि विकास समाज केन्द्रका अध्यक्ष तेजनारायण चौधरीलगायत सरोकारवालाको सहभागिता रहेको थियो ।