इनरुवा । नेपाली कांग्रेस सुनसरीले प्रधानमन्त्री केपी शर्मा ओलीको राजिनामा माग गर्दै इनरुवामा दीप प्रज्वलन गरेको छ ।
इनरुवाको लोकतान्त्रिक चौकमा बुधवार साझ नेपाली कांग्रेस सुनसरीका नेता तथा कार्यकर्ताहरुले प्रधानमन्त्री ओलीको राजिनामा माग गर्दै बिभिन्न नाराबाजी गरी दीप प्रज्वलन गरेका हुन् ।
मंगलवार सर्वोच्च अदालतले संसद् विघटनलाई बदर गरेपछि नेपाली कांग्रेसले खुशयाली मनाउँदै दीप प्रज्वलन गरेको कांग्रेस सुनसरीले जनाएको छ ।
सर्वोच्च अदालतले गरेको फैसलालाई स्वागत गर्दै नेपाली कांग्रेस सुनसरीले इनरुवाको लोकतान्त्रिक चौकमा बिभिन्न नाराबाजी गर्दै प्रधानमन्त्री ओलीले राजिनामा दिनुपर्ने माग गरेको छ ।
जनताको मर्म भावना अनुसार सर्वोच्च अदालतले गरेको निर्णय स्वागतयोग्य रहेकोले नेपाली कांग्रेस सुनसरीले दीप प्रज्वलन गरी खुशयाली मनाएको कांग्रेस सुनसरीले जनाएको छ । सर्वोच्च अदालतले विधिको शासनलाई कायम गरेको हुनाले सर्वोच्चता माथिको विश्वास जनतामा बढेर गएको ठहर सुनसरी कांग्रेसको छ ।
पुस ५ गते संसद् विघटन भएको दिनदेखी संसद् विघटन अलोकतान्त्रिक, असवैधानिक र सर्वसत्तावाद भएको नेपाली कांग्रेसले ठहर गरेको थियो ।
दीप प्रज्वलन कार्यक्रममा नेपाली कांग्रेस सुनसरीका उपसभापति हरिलाल मेहता,सचिव केदार भण्डारी, कोषाध्यक्ष पंकज महतो,संघीय सांसद सीताराम मेहता, इनरुवा–१ का वडाध्यक्ष रामचन्द्र पौदार, कृष्ण कुमार भगत, जितेन्द्र यादव, चन्दन मेहता, संयम कोइराला, अजमल अन्सारी,अरविन्द केसी, सन्तोष शर्मा लगायतको सहभागिता रहेको थियो ।
यसैगरि हरिनगर गाउँपालिका १ र २ वडामा समेत सर्वोच्च अदालतको निर्णयप्रति खुशी व्यक्त दीप प्रज्वलन गरेको छ । जनताको मागलाई सर्वोच्च अदालतले समयमै सम्वोधन गरेर मंगलवार बेलुका संसद् विघटनलाई बदर गरेपछि हरिनगर गाउँपालिकामा पनि दीप प्रज्वलन गरिएको नेपाली कांग्रेस हरिनगर गाउँपालिकाका सचिव नइम अन्सारीले जानकारी दिए । 
