पवन रौनियार
लौकही । सुनसरीको कोशी गाउँपालिका–१ मा रहेको पुरानो ऐतिहासिक दुर्गा मन्दिरको निर्माण कार्य तिब्र रुपले अगाडि बढेको छ । मन्दिरको कार्य तिब्र रुपमा अगाडि बढेकोले समयमै कार्य सम्पन्न हुने भएको छ । कामलाई तिब्रता दिएपछि मन्दिरको छत ढलान गर्ने कार्य सम्पन्न भएपछि समयमै कार्य पूरा हुने स्थानीयहरु बताउँछन् ।
स्थानीय जग्गादाता स्वर्गीय सुधिर मंडलको छोरीको नाममा दर्ता रहेको कल्पनादेबी मंडल र अर्चनादेबी मंडलले मन्दिरको नाममा जग्गादान गरेपछि सो ठाउँमा दुर्गा मन्दिर निर्माण कार्य सुरु भएको स्थानीहरुले बताएका छन् ।
भौगोलिक विवादका कारण सो निर्माण कार्य अवरोध हुँदै आएकोमा २०७६ साल जेठ महिना देखी दुर्गा मन्दिर निर्माण कार्य थालनी भएको हो ।
प्रदेश १ उधोग पर्यटन, वन तथा वातवरण मन्त्रालय र स्थानियबासीको जनश्रमदान सहित २० लाखको लागतमा लौकही दुर्गा मन्दिरको जग निर्माण कार्य सुरु भएको तत्कालीनका मन्दिर निर्माण समितीका अध्यक्ष रामचन्द्र यादवले बताए ।
केही महिना मन्दिरको निर्माण कार्य रोकिएपछि कोशी गाउपालिका–१ का अध्यक्ष राजकुमार साह (राजु ) को पहलमा देवनारायण यादवको अध्यक्षतामा उपभोक्ता समिति निर्माण गरी पुनः अधुरो कामलाई पुरा गर्ने गरी काम सुचारु भएको समितिका सचिव फुलेश्वर प्रसाद गुप्ता (रौनियार )ले जानकारी दिए ।
मन्दिरको अधुरो निर्माण योजनाको निम्ति कोशी–१ बाट पाँच लाख र दश लाख दुई चरणमा गरी १५ लाख रुपैया बिनियोजन गरेपछि मन्दिरको छत ढलान गर्ने कार्य सम्पन्न भएको उपभोक्ता समितिले जनाएको छ ।
