इनरुवा । सुनसरीको कोसी गाउँपालिका–३ मा पाँच शैयाको अस्थायी कोभिड अस्पताल उद्घाटन भएको छ । बिहीबार कोसी गाउँपालिकाका अध्यक्ष ऐयुव अन्सारीले एक कार्यक्रमबीच पाँच शैयाको अस्थायी कोभिड अस्पतालको उद्घाटन गरेको हो ।
स्वास्थ्य जनसंख्या मन्त्रालय प्रदेश १ को सहयोगमा पाँच शैयाको अस्थायी कोभिड अस्पतालबाट कोभिड–१९ कोरोना भाइरसका बिरामीहरुलाई सेवा प्रवाह गर्ने जनाएको छ । अस्पताल साविकको स्वास्थ्य चौकी भवनमा उपकरणसहित पाँच वटा शैया राखेर सेवा प्रवाह गर्ने गाउँपालिकाका अध्यक्ष ऐयुव अन्सारीले बताए ।
अन्सारीले अस्पताल उद्घाटन गर्दै सरकारको नीतिअनुसार तत्काल दश लाख लागतमा उपकरण र एक जना मेडिकल अधिकृतसहित तीन जना स्वास्थ्यकर्मीले सेवा दिने बताए । उनले अहिले पाँच शैयाको अस्पताल उद्घाटन गरिए पनि आवश्यकताको अधारमा क्रमश-१० शैयाको अस्पतालमा स्तरोन्नति गर्ने बताए ।
अस्पताल कोभिडको जोखिमबीचमा उद्घाटन भए पनि कोभिडको बिरामीसँगै अन्यखालको बिरामीलाई समेत सेवा प्रवाह गर्ने बताए । उनले डाक्टरसमेतको सेवा प्रवाह गर्ने गरी पहिलो पटक अस्पताल उद्घाटन गरिएकाले यसको सेवा लिन सबै गाउँवासीलाई आग्रहसमेत गरे ।
अध्यक्ष अन्सारीले अस्पतालका लागि कोही जग्गादाताले जग्गादान गरे आफूले अस्पताल बनाउन बजेटसहितको व्यवस्था मिलाउन तयार रहेको प्रतिबद्धता जनाए । कोसी गाउँपालिकाकी उपाध्यक्ष अनिता यादवले कोभिड अस्पतालबाट कोरोना पीडितले सेवा पाउने कुरामा दुविधा नरहे पनि अहिले कोरोनाको संक्रमण भने न्यूनीकरण हुँदै गएकाले कोसीका नागरिकले भने यसको पूर्ण सेवा लिने बताइन् ।
यादवले मानवको सबैभन्दा ठूलो धन नै स्वास्थ्य भएकाले स्वास्थ्यलाभका लागि डाक्टर तथा स्वास्थ्यकर्मीलाई इमान्दारिपूर्वक सेवा प्रवाह गर्न आग्रह गरिन् । त्यस्तै कोसी गाउँपालिकाका प्रमुख प्रशासकीय अधिकृत खगेन्द्र गिरीले कोभिडलाई पराजित गरी समाज र संसारबाटै बिदाई गर्ने बताउँदै अस्पताललाई भने मानव सेवामा समर्पित हुने गरी टिकाइ राख्ने बताए ।
उनले अहिलेकै पूर्वाधारलाई संरक्षण गर्दै सदुपयोग गर्दै स्वास्थ्य क्षेत्रको प्रभावकारीताका लागि सबैले आफ्नो ठाउँबाट भूमिका निर्वाह गर्नुपर्ने बताए । गिरीले अस्पताललाई निरन्तर रुपमा टिकाइराख्नका लागि बिस्तारै पूर्वाधार र जनशक्तिसमेत परिपूर्ति गर्दै संस्थागत गर्ने प्रतिबद्धता जनाए ।
उद्घाटन कार्यक्रममा कोसी–३ का वडाध्यक्ष सुलेमान मन्सुरीको अध्यक्षतामा सम्पन्न भएको थियो भने कोसी–१ का वडाध्यक्ष राजकुमार साह, स्वास्थ्यकर्मी आशा मेहता, स्वास्थ्य शाखा प्रमुख जमिल अख्तर, वडा सचिव रुद्रनारायण मेहता लगायतको सहभागिता रहेको थियो ।
