इनरुवा । नेपाल सरकारको मापदण्ड विपरित अवैध रुपमा सुनसरीका विभिन्न नाकाबाट नेपाल भित्रिने भारतीय माछाको कारोबारमा अंकुश लगाउन सुनसरीको सीमावर्ती क्षेत्रमा सशस्त्र प्रहरी तम्सिएको छ ।
सुनसरीको देवानगंज गाउँपालिकामा भन्सार छलेर माछा ल्याउँदै गरेको दुई सय केजी कमलकार्प माछालाई सशस्त्र प्रहरीले बुधबार नष्ट गरेको छ । सशस्त्र प्रहरी बल नेपाल बिओपी कप्तानगञ्जको मोबाइल टोलीले सो परिमाणको माछा नियन्त्रणमा लिई नष्ट गरेको हो ।
भारतको विभिन्न स्थानमा उत्पादन भई मानव स्वास्थ्यलाई असर गर्ने रसायनिक पदार्थको प्रयोग गरि अवैध रुपमा नेपाली बजार क्षेत्रमा बेचबिखनका लागि लामो समय अघिदेखि भारतीय माछा आउन थालेपछि सुनसरीको विभिन्न सीमाक्षेत्रमा खटिरहेका सशस्त्र प्रहरीले सो कारोबारलाई अंकुश लगाउने अभियानलाई तीव्रता दिएका छन् ।
सो अभियानअन्तर्गत बुधबार भन्सार छलेर चार वटा मोटरसाइकलमा कमलकार्प जातको माछा ल्याउँदै गर्दा सशस्त्र प्रहरीले कारवाही गर्दा ठूलो परिमाणको अवैध माछा छाडी मोटरसाइकल चालक फरार भएका थिए ।
चारवटा मोटरसाइकल र दुई सय केजी परिमाणको माछालाई सशस्त्र प्रहरी बल नेपाल कप्तानगंजको कार्यालयभित्र नष्ट गरिएको सशस्त्र प्रहरी निरीक्षक भुपेन्द्र बस्नेतले जानकारी दिएका छन् ।
मोटरसाइकल चालक सशस्त्र प्रहरी देखेपछि भागेको प्रत्यक्षदर्शीहरुले बताएका छन् । देवानगंज–४ बाट सशस्त्र प्रहरी कप्तानगंजले भन्सार छलेर ल्याउँदै गरेको माछालाई कार्यालयभित्र जनप्रतिनिधि, वडावासी, सञ्चारकर्मी, नागरिक समाज लगायतको उपस्थितिमा नष्ट गरेको जनाएको छ ।
भारतबाट अवैध रुपमा गुणस्तरहीन माछा ल्याई नेपाली बजारमा बेचबिखन गर्ने गरेको सशस्त्र प्रहरीको भनाइ छ । सुनसरीका विभिन्न नाका हुँदै अवैध रुपमा भारतीय माछा भन्सार छली गरेर ल्याउने गिरोह नै सक्रिय भएको खबर पाएपछि सशस्त्र प्रहरीलेनिगरानी बढाएपछि बुधबार सशस्त्र प्रहरीलाई त्यो परिमाणको माछा फेला परेको हो ।
बरामद भएको मोटरसाइकल आवश्यक कारवाहीका लागि सेतुबन्ध भन्सार कार्यालय कोशी व्यारेज पठाइएको सशस्त्रले जनाएको छ ।
