इनरुवा । सुनसरीको भोक्राहा नरसिंह गाउँपालिकाको प्रशासकीय भवनको बिहीबार शिलान्यास भएको छ । शिलान्यास कार्यक्रम न्यायिक इजलाससहित निर्माण हुन लागेको सुविधा सम्पन्न भवनको गाउँपालिकाका अध्यक्ष महेन्द्रप्रसाद यादवले शिलान्यास गरेका हुन् ।
कार्यक्रममा गाउँपालिका अध्यक्ष यादवले गाउँपालिकाको प्रशासकीय भवन नहुँदा विभिन्न समस्या झेल्दै आए पनि भवन निर्माणसँगै नागरिकलाई समेत थप सहज रुपमा सेवा दिन सकिने, स्थानीय सरकार सधैँ भौतिक पूर्वाधार विकासमा प्रतिबद्धता रहेकोसमेत उनले बताए ।
अध्यक्ष यादवले आफ्नै अत्याधुनिक भवनबाट कार्यालयको कामकाज तथा सेवा प्रवाहमा सहयोग तथा गुणस्तरीयता बढ्ने विश्वास व्यक्त गरेका छन् । भोक्राहा नरसिंह गाउँपालिकाका प्रमुख प्रशासकीय अधिकृत रामचरित्र मेहताले गाउँपालिका भवनबाट जनतालाई छिटो छरितो सेवा प्रवाह गर्ने र जनताले चाहेकोजस्तो गुणस्तरीय सेवा प्रवाह गर्ने बताएका छन् ।
अधिकृत मेहताले अहिले गाउँपालिकाले घरको भाडा तिरेर कामकाज गरिरहेको बताए । आफ्नै भवन भएपछि भाडाको रकम बचत हुने र बचत भएको रकमबाट विकासको काममा लगाउने विश्वाससमेत व्यक्त गरेका छन् । चार करोड ४३ लाखमा तीन तले भवन निर्माण हुन लागेको गाउँपालिकाकी उपाध्यक्ष पुनम मेहताले जानकारी दिएकी छिन् ।
उक्त भवन निर्माणको ठेक्का आशीर्वाद निर्माण सेवा उदयपुरले पाएको छ । उक्त भवन १८ महिनाभित्र सम्पन्न गर्ने गरी सम्झौता भएको र यदि निर्माण सेवाले १२ महिनाभित्र भवन निर्माण सम्पन्न गरेमा गाउँपालिकाले पाँच प्रतिशत बोनस उपलब्ध गराउने छ ।
गाउँपालिकाको प्रशासकीय भवन निर्माणको लागि खगेन्द्र श्रेष्ठले साढे ६ कठ्ठा निःशुल्क जग्गादान गरेका छन् । जग्गादाता श्रेष्ठलाई शिलान्यास कार्यक्रममा दोसल्ला ओढाएर सम्मान गरिएको स्थानीय पत्रकार अजमल अन्सारीले जानकारी दिए । कार्यक्रममा वडाध्यक्षहरु सुकदेव यादव, आलम अन्सारी, हारुण अन्सारी, रामचन्द्र यादव, हातिम अन्सारी लगायत सरोकारवालाको उपस्थिति रहेको थियो ।
