इनरुवा । नेपाल बाल संगठन जिल्ला कार्यसमिति सुनसरीको सभापतिमा देवानन्द मेहता निर्विरोध चयन भएका छन् । नेपाल बाल संगठन सुनसरीको अधिवेशनबाट पुनः देवानन्द मेहतालाई सभापति पदमा निर्विरोध चयन भएका हुन् ।
मेहताको सभापतित्वको नेतृत्वमा आठ सदस्यीय जिल्ला कार्यसमिति चयन गरेका हुन् । संगठनका जिल्ला सदस्यहरुमा ऋतिक यादव, रमेशकुमार यादव, अफाक अहमद, रविन्द्र भट्टराई, सत्यनारायण मेहता, सरिता कार्की घिमिरे र इन्दिरा सुवेदी निर्विरोध चयन भएका हुन् ।
नेपाल बाल संगठन सुनसरी अधिवेशनलाई उद्घाटन गर्दै कार्यक्रमका प्रमुख अतिथि विद्या न्यौपानेले बाल संगठनको नाममा रहेको जग्गाहरु फिर्ता गर्न आफू देशभर अभियानको क्रममा लागि परेको बताइन् ।
जिल्लाका प्रमुख जिल्ला अधिकारीहरुसँग समन्वय र बाल संगठनका पादधिकारीहरुसँग सहकार्य गरी देशभर बाल संगठनका नाममा कब्जा गरेका जग्गाहरु फिर्ता गर्ने अभियानलाई तीव्रता दिएकोसमेत बताइन् ।
उद्घाटन सत्रलाई सम्बोधन गर्दै सुनसरीका प्रमुख जिल्ला अधिकारी उमेश ढकालले बाल संगठनले बालबालिकाहरुको हकहित र अधिकारका पक्षमा काम गर्न अनुरोध गरेका थिए ।
ढकालले सुनसरी जिल्लामा नमुना कार्य गरी बाल संगठनको नाम उच्च राख्न सबैले भूमिका खेल्नुपर्नेमा जोड दिएका थिए । भूमि समस्या समाधान आयोग सुनसरीका अध्यक्ष तथा पूर्वमेयर खेमराज पोखरेलले नेपाल बाल संगठन सुनसरीले बालबालिकाको अधिकार सुनिश्चितताका लागि अग्रसर हुनुपर्ने बताए ।
संगठनमा जोश जाँगरका साथ काम गर्ने युवाहरुको टिम भएकाले सुनसरीमा बालबालिकाको क्षेत्रमा नयाँ परिवर्तन हुने जिकिरसमेत गरे । नेपाल बाल संगठन सुनसरीका सभापति देवानन्द मेहताले अधिवेशनबाट फेरि आफूलाई नै जिम्मेवारी दिएकाले निष्ठापूर्वक काम गर्ने प्रतिबद्धता व्यक्त गरेका छन् ।
सुनसरीमा बाल संगठन मार्फत बालबालिकाहरुका लागि इमान्दार भएर सबै पालिकाहरुमा नयाँ योजना र रणनीति बनाएर अघि बढ्नेसमेत उनले बताए । मेहताका अनुसार आफूले कार्यसमितिमा दुई जना र केन्द्रीय समितिबाट एक जना मनोनित गरिनेसमेत जनाएको छ ।
