इनरुवा । सुनसरीको कोसी गाउँपालिका–३ का गंगाई दास मलाहालाई ज्यान मारेको दुई महिना बित्दासमेत दोषीलाई कारवाही भएको छैन । पुस ७ गते राती १० बजेतिर गंगाई दास मलाहाका छिमेकीहरुले ज्यान मारेको पीडित पक्षले जिल्ला प्रहरी कार्यालय सुनसरीमा किटानी उजुरी दिए पनि कारवाही हुन नसकेको पीडित पक्षको भनाइ छ ।
शनिबार पत्रकार सम्मेलनको आयोजना गरी मृतकका छोेरा शम्भु मुखियाले न्यायका लागि गुहारे पनि जिल्ला प्रहरी कार्यालयबाट कुनै सहयोग नपाएको गुनासो गरेका छन् । मृतकका छोरा मुखियाले आफ्नो बुबालाई कोसी–३ का उदयचन्द मुखिया, कृपा मुखिया, मनोज मुखिया, सुवालाल मुखिया र पवन मुखियाका समूहले हात, मुड्की, माछा काट्ने काठको मुडालगायतको घरेलु सामाग्रीले कुटपिट गर्दा घटनास्थलमै मृत्यु भएको बताएका छन् ।
पीडित परिवारले पत्रकार सम्मेलन गरी किटानी जारी दिए पनि अभियुक्तहरु खुलेआम घुमफिर गरिरहेको र आफूहरुलाई ज्यान मार्ने धम्की दिइरहेको बताएका छन् । केही दिनअघि जिल्ला प्रहरी कार्यालय सुनसरीमा अभियुक्तहरुलाई राखिएको थियो तर मोटो रकम लिएर अभियुक्तहरुलाई छाडेको र अहिले उनीहरु निर्धक्क खुलेआम घुमिरहे पनि सुनसरी प्रशासनले कुनै वास्ता नगरेको पीडित पक्षको भनाइ छ ।
सो विषयमा अनुसन्धान गर्ने निकायले फितलो अनुसन्धान गरी मुद्दाको शिर्षक नै परिवर्तन गरी कर्तव्य ज्यान जस्तो जघन्य अपराधमा अभियुक्तलाई उन्मुक्ति दिने मनसायले प्रेरित भई गरेको अनुसन्धान अभियोजन गर्ने उपर पीडित परिवारको चित नबुझी महान्यायाधिवक्ताको कार्यालय काठमाडौंमा फागुन ९ गते आवश्यक कानुनी कारवाही गरी निर्देशन पाउनका लागि दर्ता नम्बर ११३८१ को उजुरी निवेदन दर्ता गरेको छ ।
भारतबाट अवैध कपडा ल्याई सो ठाउँमा भण्डारण गर्दै गरेको अवस्थामा पीडित पक्षले किन यहाँ कपडाको बोरा राखेको रु भन्दा उनीहरुको समूहले कुटपिट गरिरहेको बेला ८० वर्षीय बृद्ध गंगाई दास मलाहालाई कुटपिट गर्दा उनको घटनास्थलमै मृत्यु भएको प्रत्यक्षदर्शीको भनाइ छ ।
पीडित शम्भु मुखिया लगायतको परिवारले आफूहरुलाई न्याय पाउनु पर्ने जिकिर गर्दै अभियुक्तहरुलाई कडाभन्दा कडा कारवाही हुनुपर्ने माग राख्दै आजीवन कैदको सजाय भए आफूहरुलाई आत्मसन्तुष्टि हुने पत्रकार सम्मेलनमा बताएका छन् । न्याय दिलाउनका लागि मानव अधिकारकर्मी, संचारकर्मी, राजनैतिक दल, वृद्धिजीवि, युवा विद्यार्थी लगातका सबैलाई पहल गरिदिन पीडित पक्षले अनुरोध गरेका छन् ।
