टोमराज मेहता
इनरुवा । अस्पताल सुधार संघर्ष समिति इनरुवा सुनसरीको नाममा चार महिनाअघि गठन भएको समितिमा विवाद उत्पन्न भएको छ । संघर्ष समितिका संयोजक दिलिपचन साहुले सुशासन अभियानअन्तर्गत काम गर्ने प्रतिबद्धता जनाएर गुमराहमा पारी चार महिना नपुग्दै आफ्नो विवादस्पद कार्यशैली देखाएपछि विवाद उत्पन्न भएको हो ।
समितिको संयोजक साहुले पूर्ण रुपमा स्वतन्त्र र नागरिक समाजको दवाव र खबरदारी समूह जस्तो हुने आश्वासन दिए पनि कार्यशैलीमा आफ्नो व्यक्तिगत राजनीतिक स्वार्थका लागि नगरबासी र समितिका सदस्यलाई समेत गुमराहमा पारेको खुलेपछि समितिमा विवादमा उत्पन्न भएको हो ।
समितिका प्रवक्तासमेत रहेका शंकर सापकोटाले आफूहरु इनरुवा नगरको विकास र सुशासन तथा इनरुवा अस्पताल सुधार गर्ने प्रयासस्वरुप समिति निर्माण गरेपनि संयोजक साहुले राजनीति गन्ध प्रवेश गराएर व्यक्ति स्वार्थपूर्तिका लागि सक्रिय भएपछि आफूहरु सशंकित बनेको आरोप लगाएका छन् ।
उनले समितिलाई जुन उद्धेश्य प्राप्तिका लागि गठन गरी परिचालन गरिएको थियो, त्यसमा संयोजकले विवादस्पद र पार्टीगत गतिविधि छिराएकाले समितिमा व्यक्तिगत स्वार्थका लागि आएको प्रष्ट भएको आरोप लगाए ।
सापकोटाले समितिको उद्धेश्य र एजेन्डा जायज भए पनि कार्यान्वयन गर्ने समितिका संयोजक साहु आफै आफ्नो निकटको पार्टीसँगको गतिविधिसमेत समानान्तर रुपमा चलाएको बाहिर गुनासो आएकाले त्यसबारे स्पष्ट पार्न र आन्दोलनको क्रममा गिरफ्तारीको बेला जनता समाजवादी पार्टी नेपाल सुनसरीले प्रेस विज्ञप्ति जारी गरेको घटनामा खण्डन गर्न भन्दा अटेरी गरेको कारण समितिमा विवाद उत्पन्न भएको खुलासा गरे ।
सापकोटोले समिति निर्माण र १० वटै वडामा वडा संघर्ष समितिम गठन हुदाँसम्म राम्रै अवस्था रहे पनि माघको अन्तिम सत्ता र फागुनमा भएको बृहत अन्तरक्रिया कार्यक्रमसम्म केही मात्रामा स्वार्थ र राजनीतिक जोडिएर आएपछि त्यसबारेमा प्रश्न उठाउँदा साहु अस्पष्ट भएको समेत उनको आरोप छ ।
उनले अभियान राम्रो भए पनि स्वार्थीहरुको व्यक्तिगत स्वार्थले केही विवाद उत्पन्न भएपनि आफूहरुको जनहित अभियान भने जारी रहने स्पष्ट पारें । सापकोटालाले आफू समितिको प्रवक्ता रहे पनि प्रवक्ताको काम गर्ने वातावरण नदिएको र समितिले गरेको निर्णय बाहिर गएर संयोजकले आफ्नो इसारामा संघर्ष समितिलाई डो¥याउन खोजेकोप्रति समितिको ध्यानाकर्षण भएकोसमेत बताए ।
अस्पताल संघर्ष समितिका अर्का सचिवालय सदस्य ज्ञानदेव पण्डितले समितिका संयोजक साहुले आफ्नो भाषणका क्रममा केही तथ्यहिन र व्यक्तिगत स्वार्थपूर्तिका लागि आफ्नो मन्तव्य राखेकोमा आपत्ति जनाएका छन् ।
इनरुवामा हालै सम्पन्न भएको संघर्ष समितिको कार्यक्रममा संघीय सांसद, इनरुवा नगरप्रमुख र अन्य केही सरोकारवालाको व्यक्तिगत नाम जोडेर अफवाह र भ्रमात्मक कुरा गरेकाले त्यसबाट समितिको समेत साखमाथि प्रश्न उठाएकाले साहुलाई त्यसबारेमा स्पष्टीकरण दिन आग्रहसमेत गरे ।
पण्डितले जिम्मेवार व्यक्तिले जिम्मेवार अभिव्यक्ति दिनुपर्नेमा व्यक्ति स्वार्थ सिद्धिका लागि भाषण गरेकाले त्यसप्रति आपत्ति जनाउँदै साहुले संस्थागत रुपमै आत्म आलोचित हुनुपर्ने बताए ।
उनका अनुसार संयोजक साहुको कार्यशैलीले समितिलाई मजबुत बनाउनेभन्दा कमजोर पार्ने र लक्ष्य प्राप्ति गर्नुभन्दा लथालिङ्ग पार्नेखालको भएकाले समिति दीर्घकालीन हुन नसक्ने अवस्थामा पुगेको दाबी गरे । समितिको माग मुद्दाहरु सम्बोधनभन्दा साहुको कार्यशैलीले बीचैमा तुहिने सम्भावना बढेर गएको पण्डितको टिप्पणी रहेको छ ।
यसअघि नेपाली कांग्रेस इनरुवा नगर कार्यसमितिले संयोजक साहुको अभिव्यक्तिप्रति आपति जनाइसकेको छ ।
