इनरुवा । सुनसरीको इनरुवामा प्रदेश स्तरीय तीन दिने लोककला कार्यशाला सम्पन्न भएको छ । लोककलाको संरक्षण तथा प्रवद्र्धन गर्ने उद्देश्यका साथ तीनदिने लोककला प्रशिक्षण, कार्यशाला आइतबार देखि शुरु भएर मंगलवार सम्पन्न भएको छ ।
कार्यक्रम नेपाल ललितकला प्रज्ञा प्रतिष्ठान, लोककला विभागको आयोजना तथा इनरुवा नगरपालिकाको सहकार्य र नवयुग बहुउद्देशियको संयोजनमा लोककला कार्यक्रम सम्पन्न भएको हो ।
इनरुवामा प्रदेशस्तरीय लोककला कार्यशाला सम्पन्न हुनु अघि अगाडि प्रदेश २ को सप्तरी र प्रदेश ५ को दाङमा लोककला कार्यशाला सम्पन्न गरिएको र अब मुलुकका अन्य स्थानमा पनि यस्तै कार्यशाला र प्रदर्शनीहरु आयोजना गर्न लागिएको आयोजको भनाई छ ।
समापन कार्यक्रमका अध्यक्ष खेमराज पोखरेलले उत्कृष्ट मौलिक कलालाई तीन दिन सम्म स्थान दिनु नै कार्यक्रमको सफलता भएको बताएका छन् । उनले भने, ‘आफुहरुले सोचेको भन्दा पनि राम्रो सहभागीता र राम्रा चित्रहरु सहभागिहरुले बनाउँदा खुशी भएको छु ।
लोककलाको विकासविना अरु कलाको विकास हुन असम्भव रहेको उनले बताए । आफ्नो कला, संस्कृति र परम्परा जोगाउनका लागि लोककलाले सहयोग पुग्ने पोखरेलको भनाई छ । कार्यक्रममा जीवनाथ पोखरेल पन्छी , संजय बान्तोला, कलाकार अनुराधा थापा लगायतकाले लोककलाको महत्वका बारेमा बोल्दै लोककलालाई संरक्षण र सम्वद्र्धन गर्न सबै एकजुट भएर लाग्नुपर्ने आवश्यक रहेको बताए ।
कार्यशालामा मिथिला चित्रकला, नेवार, थारु, राजवंशी, तामाङ कलाको प्रदर्शनी गर्दै बिभिन्न जातजाति, भाषाभाषीको लोप हुन लागेको कलालाई प्रदेश स्तरीय लोककला कार्यशालाले थप उर्जा दिने र लोककलालाई बजारीकरण गरी जीवीकोपार्जन गर्न समेत सहज हुने कार्यक्रमका वक्ताहरुले जोड दिएका थिए । सुनसरी,उदयपुर,मोरङ,झापा, धनकुटा लगायत १२ वटा जिल्लाहरुबाट दुई दर्जन भन्दा बढीको सहभागिता रहेको थियो ।
