इनरुवा । सदरमुकाम इनरुवामा निर्माण हुन लागेको घणटघर र पार्क निर्माणको इनरुवा नगरपालिकाका मेयर राजन मेहताले शिलान्यास गरेका छन् । इनरुवा नगरपालिका १ स्थित बन्न लागेको घण्टाघर पार्क निर्माणकार्यको एक कार्यक्रमका बीच बुधबार मेयर मेहताले शिलान्यास गरेका हुन् ।
२०७७ माघ २९ गतेबाट निर्माण सुरु भएको घण्टाघर र पार्क निर्माणको कार्य २०७८ माघ २८ गतेसम्पन्न गर्नेयोजना रहेको ठेकेदार कम्पनीले बताएको छ । इनरुवाको मुख्यबजारमा बन्न लागेको घण्टाघर र पार्क निर्माण बनाउने जिम्मा प्रचवी विल्डर्स इनरुवा २ ले पाएको छ् ।
इनरुवा नगरपालिकाको ८९ लाख ८७ हजार ३८७ रुपैयाँभ्याटसहित लागतमा सो घण्टाघर र पार्क निर्माण हुन लागेको हो । उक्त शिलान्यास कार्यक्रममा इनरुवा नगरपालिकाका इन्जिनियर उमेश मेहता, ठेकेदार कम्पनीका संचालक प्रकाश मेहता,इनरुवा नगरपालिका १ का वडाध्यक्ष रामचन्द्र पौदारलगायत जनप्रतिनिधि,कर्मचारी,सुरक्षाकर्मी,स्थानीयबासीको उपस्थिति रहेको थियो ।
शिलान्यास कार्यक्रमलाई सम्बोधन गर्दै मेयर राजन मेहताले इनरुवा क्षेत्रलाई आधुनिक बनाउने अभियान अन्तर्गत घण्टाघर र पार्क निर्माणकार्य हुन लागेको बताए ।
घण्टाघरको निर्माणकार्य सम्पन्न भएपछि सर्वसाधारणले सोघण्टाघरबाट इनरुवाबजारका साथै आसपासका दृष्य अवलोकन गर्न सकिने उनले बताए । निर्वाचित भएदेखि आकर्षक र आधुनिक इनरुवा बनाउन निरन्तर लागिपरेको मेहताको भनाइ छ ।
घण्टाघरलाई थप आकर्षक बनाउन पार्कसमेत निर्माण गर्न लागिएको हो । निर्वाचित भएपछि जनप्रतिनिधि कुनै पार्टी वा समूहमा मात्रै सिमित रहनुहुँदैन सबैको साझा बन्नुपर्नेमा उनले जोड दिए ।
निर्वाचित भएदेखि आफू सबैको साझा भएर काम गर्दै आएको उनको दाबी छ । घण्टाघर र पार्क निर्माणकार्य निर्धारित समयमै सम्पन्न गर्नसमेत मेयर मेहताले ठेकेदार कम्पनीलाई निर्देशनसमेत दिए ।
