इनरुवा । नेपाली कांग्रेसका केन्द्रीय सदस्य तथा पूर्व गृह मन्त्री कृष्ण प्रसाद सिटौलाले नेपाली कांग्रेसले तोकिएको समयमा १४ औं महाधिवेशन सम्पन्न गर्नुपर्ने बताएका छन् ।
नेपाली कांग्रेस सुनसरीको पार्टी कार्यालयमा आयोजित अगुवा कार्यकर्ता तथा भेटघाट कार्यक्रमलाई सम्वोधन गर्दै सिटौलाले नेपाली कांग्रेसको १४ औं महाधिवेशन तोकिएको समयमै गर्नुको विकल्प नरहेको बताए ।
नेपाली कांग्रेसमा सबै एक जुट भएर महाधिवेशनलाई सफल बनाउन आफनो ठाउँबाट भूमिका निर्वाह गर्नुपर्ने बताए । नेपाली कांग्रेसले तोकिएको समयमा महाधिवेशन गर्न नसकिए ठूलो संकट उत्पन्न हुन सक्ने उनले बताए ।
नेपाली कांग्रेसले भदौमा भनिएको महाधिवेशनको तयारीमा लाग्न नेता तथा कार्यकर्ताहरुलाई आग्रह समेत गरे । नेपाली कांग्रेसका क्रियाशिल सदस्य नवीकरण र नयाँ क्रियाशिल सदस्यको पहुँच गाउँ गाउँमा पुर्याउनुपर्ने भएकोले कोही कसैलाई बञ्चित नगर्न उनले आग्रह गरे ।
नेपाली कांग्रेसकै नेतृत्वमा सरकार गठनका लागि पहल गर्न सभापति शेरबहादुर देउवालाई पार्टीका पूर्व महामन्त्री समेत रहेका कृष्णप्रसाद सिटौलाले सुझाव दिएका छन् ।
सबै दल मिलेर जसरी पनि अहिलेको ओली सरकारलाई हटाउनुपर्ने नेता सिटौलले बताउँदै पार्टीका सभापति देउवालाई आफूहरुले केन्द्रिय समितिको बैठकमा स्पष्ट रुपमा तीन दलसँग सहमति गरेर कांग्रेस नेतृत्वमा सरकार गठन गर्न पहल गर्नका लागि सुझाव दिएको बताए ।
कम्यूनिष्टहरुले अहिलेको अवस्थामा निर्वाचन गरायो भने निर्वाचन निष्पक्ष, स्वतन्त्र र धाधलीरहित हुनेमा आशंका रहेकाले त्यसको नेतृत्व काङग्रेसले नै लिनुपर्ने नेता सिटौलाको तर्क थियो ।
अहिलेको सरकारले जनतालाई राहत दिनुको सट्टा दुःख दिने काम मात्र गरेको नेता सिटौलाले भने,‘अहिलेको सरकारले जसबाट सबै भन्दा बढी मत बटुलेका थिए त्यसैलाई नै सबै भन्दा बढी दुःख दिने कार्यमा उद्धत रहेको छ ।’
कार्यक्रममा प्रदेश १ का प्रमुख प्रतिपक्षीदलका नेता तथा जिल्ला सभापति राजिव कोइराला, प्रदेश १ का संसाद ज्योति सुब्बा, नवोदिता चौधरी, बिराटनगर महानगरपालिकाका प्रमुख भिमप्रसाद पराजुली, कोशी गाउँपालिकाका अध्यक्ष अयुव अंसारी, जिल्ला सचिव केदार भण्डारी, कोषाध्यक्ष पंकज महतो, बिभिन्न स्थानीयतहका प्रमुख तथा प्रतिनीधिहरु लगायतको सहभागीता रहेको थियो ।
कार्यक्रममा ४१ बर्ष देखि बिभिन्न पत्रपत्रिका बिक्री गर्दै आएका सुनिल सिंहलाई पार्टीले सम्मान गरेको छ । सिंहलाई दौसल्ला र सम्मानपत्रले सम्मान गरेको नेपाली कांग्रेस सुनसरीका कोषाध्यक्ष पंकज महतोले जानकारी दिएका छन् ।
सोही कार्यक्रममा बिभिन्न पार्टी परित्याग गरि एक दजर्न भन्दा बढी कांग्रेसका प्रेवश गरेका छन् । नवप्रवेशीहरुलाई अबिरको टिका लगाई कांग्रेसका नेताहरुले स्वागत समेत गरेका थिए ।
