विराटनगरका पुर्वमेयर अशोक कोइरालाको आज बिहिवार विहान निधन भएको छ । उनको ७७ वर्षको उमेरमा विराटनगरको न्युरो अस्पतालमा उपचारको क्रममा निधन भएको हो । ७७ वर्षिय कोइरालाको मध्यरात पछिको समयको करिब १ बजे निधन भएको हो ।
उनको निधन भएको पुष्टि गर्दै नेपाली कांग्रेस मोरंग जिल्ला सभापती डिग बहादुर लिम्बुले कोइराला लामोसमय देखि मुटु सम्बन्धि रोगको उपचारमा रहेको बताए । ‘हिजो भेट्न अस्पताल जाँदा उहाँलाई स्वासप्रस्वासको समस्या थप बढेको देखेको थियौं’ आवर विराटनगरसँग टेलिफोनमा कुरा गर्दै लिम्बुले उनको पछिल्लो अवस्था स्मरण गर्दै बताए । ‘उहाँको निधनबाट नेपाली कांग्रेस पार्टी र समग्र लोकतन्त्रलाई नै ठुलो नोक्सानी भएको छ ।’ लिम्बुले भने ‘अझ काँग्रेस मोरगंलाई अपुरनीय क्षति भएको छ ।’
लिम्बुका अनुसार कोईरालाको पार्थीव शरिरलाई अन्तिम विदाई तथा श्रद्धाञ्जलीका लागि पार्टीको जिल्ला कार्यालयमा राख्ने तयारी भइरहेको छ । अन्तिम विदाईका लागि नेपाली काँग्रेसका महामन्त्री डा शशांक कोईराला, डा. मिनेन्द्र रिजाल, डा. शेखर कोईराला, डिला संग्रौलालगायतका वरिष्ठ नेताहरु आउनेक्रममा रहेको लिम्बुले बताए ।
केन्द्रियस्तरका नेताहरु आउने र पार्टी कार्यालयमा पार्थीव शरिरलाई श्रद्धाञ्जलीका राखिने भएकाले अन्त्यष्टी २ बजेपछि गरिने तयारी रहेको लिम्बुले बताए । अहिले उनको पार्थीव शरिरलाई विराटनगर महानगरपालिका–८ स्थित निजी निवासमा श्रद्धाञ्जलीका लागि राखिएको छ।
२०४८ सालको स्थानीय निर्वाचनबाट तत्कालिन विराटनगर उपमहानगरपालिकाका मेयर निर्वाचित भएका थिए । नेपाली कांग्रेसको राजनीतिमा सक्रिय उनि मोरङको पुर्वसभापति, संविधानसभा सदस्य समेत हुन् ।
श्रोत: https://ourbiratnagar.net
