इनरुवा । इनरुवा नगरपालिकाका नगरप्रमुख राजन मेहताले इनरुवामा निर्माणाधीन रहेको घण्टाघरको निरीक्षण गरेका छन् । घण्टाघरको निर्माण कार्यलाई तीव्रता दिनका लागि नगर प्रमुख मेहताले निर्माण कम्पनीलाई आग्रह गरेका हुन् ।
इनरुवा–१ मा निर्माण हुन् लागेको घण्टाघर र पार्क निर्माणको कार्य सुरु भएपछि इनरुवा नगरपालिकाका नगरप्रमुख मेहताले बुधबार निरीक्षण गर्दै घण्टाघरलाई नमुना बनाउन आवश्यक रहेको बताए । नगरप्रमुख मेहताले घण्टाघर र पार्क निर्माण कार्य सुचारु भएकाले तोकिएको समयमा कार्य सम्पन्न गर्न निर्माण कम्पनीलाई अनुरोध गरेका छन् ।
नगरप्रमुख मेहताले निरीक्षण गर्दै इनरुवा विकासमा फड्को मारेकाले घण्टाघरले इनरुवाको पहिचानमा थप मद्दत पुग्ने बताए । घण्टाघर निर्माण भएपछि इनरुवाको रौनक बढ्ने उनले बताए । सम्झौता भएअनुसार काम गर्न अनुरोध गर्दै मेयर मेहताले कमसल काम नगर्न निर्माण कम्पनीलाई सुझाव दिएका छन् ।
घण्टाघरलाई थप डिजाइन गरी आकर्षक बनाउनका लागि आफूले थप सहयोग गर्न तयार रहेको उनको कथन छ ।
निर्माण कार्यलाई लापारवाही नगरी समयमा कामलाई प्राथमिकता दिई सम्पन्न गराउन निर्माण कम्पनीले भूमिका खेल्न आवश्यक रहेको उनले बताए । नगरप्रमुख मेहताले निरीक्षण गर्दै सुरुवाती काम राम्रो भएको बताउँदै अन्तिम समयसम्म गुणस्तरीय काम गर्नुपर्नेमा जोड दिएका थिए ।
इनरुवाको मुटुमा घण्टाघर निर्माण भएपछि बजारमा चहलपहल बढ्ने उनको भनाइ छ । २०७७ माघ २९ गतेबाट निर्माण सुरु भएको घण्टाघर र पार्क निर्माणको कार्य २०७८ माघ २८ गते सम्पन्न गर्नेयोजना रहेको ठेकेदार कम्पनीले जानकारी दिएका छन् । प्रचवी विल्डर्स इनरुवा–२ ले घण्टाघर र पार्क निर्माण गर्न ठेक्का पाएको छ । इनरुवा नगरपालिकाको ८९ लाख ८७ हजार ३८७ रुपैयाँ भ्याटसहित लागतमा घण्टाघर र पार्क निर्माण हुन लागेको हो ।
