केराबारी । मोरङको केराबारी गाउँपालिका–७ नर्कटेस्थित बिहे घरमा ज्यानै लिने गरी आक्रमण गरिएको घटनामा संलग्न समूहका मुख्य नाइकेसहित दुई जना शनिबार पक्राउ परेका छन् । चार जनामाथि साङ्घातिक हमला गर्ने समूहको नेतृत्वकर्ता केराबारी–७ का २९ वर्षीय मुस्कान लिम्बू र घटनामा संलग्न ३० वर्षीय विश्वास चेम्जोङ लिम्बू पक्राउ परेका हुन् ।
इलाका प्रहरी कार्यालय बेलबारीका प्रहरी निरीक्षक ऋषिराज ढकाल नेतृत्वको टोलीले मुस्कानलाई सुन्दरहरैँचा नगरपालिका–१२ र विश्वासलाई केराबारीबाटै पक्राउ गरेको हो । शनिबार पक्राउ परेका दुई जनालाई अनुसन्धान प्रतिवेदनसहित प्रहरीले आइतबार अदालतमा बुझाउने तयारी गरेको छ ।
आक्रमणकारीमध्ये केराबारी–७ का २२ वर्षीय विशाल लिम्बूलाई भने प्रहरीले घटना लगत्तै गत फागुन १५ गते पक्राउ गरेको थियो । विशाललाई भने पूर्पक्षका लागि कारागार चलान गर्न अदालतले आदेश दिइसकेको छ ।
गत फागुन १५ गते करिब बिहान ३ बजे मादक पदार्थ सेवन गरेको समूहले बिहेको कार्यक्रम सकिएर बेहुला–बेहुलीसहित सबै जना सुतिसकेपछि भागीमान लिम्बूको घरमा आक्रमण गरेर चार जनालाई घाइते बनाएको थियो ।
भगीमानकी छोरी २३ वर्षीया सम्झना लिम्बू र नुवाकोट घर भएका सुदीप राईबीचको बिहेको कार्यक्रम समापन भइसकेपछि ढुंगामुडा गर्दै पुगेको समूहले घरेलु हतियार खुकुरी, भाला, रड, दाउरा लगायतले आक्रमण गरेको प्रहरीले जनाएको छ ।
आक्रमणमा बेहुलीका बुवा ५९ वर्षीय भागीमान, दिदी ३० वर्षीया सविना लिम्बू ९राई०, कान्छा मामा केराबारी–९ का ४५ वर्षीय भगत याक्खा र बिहेमा बेहुलातर्फबाट जन्ती आएका भोजपुरको भोजपुर नगरपालिका–७ का ३३ वर्षीय रमेश राई घाइते भएका थिए । उनिहरूको अझैसम्म पनि उपचार भइरहेको छ ।
घटनामा संलग्नमध्ये केराबारी–७ का २४ वर्षीय निशान लिम्बू, २७ वर्षीय चिनो लिम्बू, केराबारी–१० का २९ वर्षीय भाइराजा सुब्बा र सुनसरीको धरान उपमहानगरपालिका–१३ का २२ वर्षीय नगेन बुढाथोकी फरार छन् । उनीहरुको खोजी तीव्र रुपमा भाइरहेको प्रनि ढकालले बताए ।
घटनामा संलग्नमध्ये मुस्कान र निशान एउटै परिवारका दाजु–भाइ हुन् । आक्रमणकारी गाउँघरमा दादागिरी र गुण्डागर्दीमार्फत सर्वसाधारणमा आतंक खडा गर्ने समूह रहेको पाइएको मोरङ प्रहरी प्रमुख एसपी सन्तोष खड्काले जानकारी दिए ।
श्रोत:arisenepal.com
