धरान । प्रदेश १ ट्राफिक प्रहरी कार्यालय इटहरी, सुनसरीले ‘तपाईँको मास्क खोइ ?’ भन्ने सचेतनामूलक कार्यक्रमको अभियान प्रदेश १ भरि चलाएको छ । हाल विश्वको कतिपय मुलुकहरूमा कोरोना भाइरसको दोस्रो लहर सुरु भइसकेको र नेपालमा समेत यसको प्रभाव पर्न गई संक्रमितको संख्या दिन प्रतिदिन बढ्दै गइरहेको हुँदा कोरोना भाइरसको न्यूनीकरण गर्ने उद्देश्यले प्रदेश ट्राफिक प्रहरीले प्रदेश नं १ का १४ वटा जिल्लामा ‘तपाईँको मास्क खोइ ?’ भन्ने सचेतनामूलक कार्यक्रमको अभियान चलाएको हो ।
प्रदेश नं १ मा अस्थायी ७३ र स्थायी १९ वटा गरी ९२ वटा युनिटमा सञ्चालन रहेका छन् । जसमा कार्यरत रहेका चार सय १० जना ट्राफिक प्रहरीले मंगलबार बिहान १० बजे एकै समयमा सडकमा मास्क नलगाएका पैदल यात्री र सवारीसाधन चालकहरूलाई कोरोना भाइरसको संक्रमणबाट बच्न अनिवार्य रूपमा मास्कको प्रयोग गरौँ भन्ने जानकारीका साथ मास्क वितरण गरिएको प्रहरीले जनाएको छ ।
विभिन्न सामाजिक सङ्घ संस्थाहरूबाट उपलब्ध भएका १६ हजार नौ सय ५५ थान मास्क सडकमा मास्कबिना पैदल यात्रा गर्ने यात्री र चालकलाई वितरण गरिएको प्रदेश १ ट्राफिक प्रहरी कार्यालयका प्रवक्ता सुमनकुमार तिम्सिनाले जानकारी दिए ।तश्विर:कपुरी न्युज बाट
