भोक्राहा । भोक्राहा नरसिंह गाउँपालिका अध्यक्ष महेन्द्रप्रसाद यादवलाई प्रहरीले तेस्रो पटक म्याद थप गरेको छ ।
किशोरी बलात्कारको अभियोगमा नियन्त्रणमा रहेका यादवको हकमा हिजो सुनसरी जिल्ला अदालतले ७ दिन म्याद थपेको हो ।
यादवको हकमा अदालतबाट यसअघि पहिलो पटक ५ दिन र दोस्रो पटक ७ दिन म्याद थप भएको थियो ।
धरान प्रहरीको नियन्त्रणमा रहेका यादव उपरको अनुसन्धान बाँकी रहेकाले अदालतबाट तेस्रो पटक म्याद थप गरिएको जिल्ला प्रहरी कार्यालय सुनसरीका प्रवक्ता डिएसपी नेरेन्द्रकुमार कार्कीले बताए ।
यादव उपर किशोरीमाथि बलात्कारको अभियोग लागेको छ । यादवलाई प्रहरीले बैशाख ८ गते धरान भेडेटार लाइनको डुकु होटल एण्ड लजबाट आपत्तिजनक अवस्थामा १७ वर्षीया किशोरीसहित रङ्गेहात पक्राउ गरेको थियो ।
पीडितको अभिभावक समेतको जाहेरीका आधारमा प्रहरीले यादव उपर जबरजस्ती करणी मुद्दामा कारबाहीको प्रकृया अघि बढाउँदै आएको छ ।
श्रोत:ब्लाष्टखवर
