हरिनगर । सुनसरीको हरिनगर गाउँपालिकासँग जोडिएको सीमावर्ती क्षेत्रमा सशस्त्र प्रहरीले कडाई गरिएको छ ।
जिल्ला प्रशासन कार्यालय सुनसरीको डीसीसीएमसीको बैठकले जारी गरेको १५ दिने निषेधाज्ञालाई सफल बनाउनका लागि सशस्त्र प्रहरी बल नेपाल बीओपी घुस्कीका सशस्त्र प्रहरीको टोलीले आइतवार दोश्रो दिन पनि दिनभर कडाई गरिएको हो ।
नेपालसँग जोडिएको घुर्नाबाट आवतजावत गर्न पूर्ण रुपमा रोक लगाइएको छ । सशस्त्र प्रहरी बल नेपाल बीओपी घुस्कीका प्रहरी निरीक्षक सन्तोष सुवेदीका अनुसार खुल्ला सीमा नाकाका कारण काम गर्न समस्या भएपनि हामीहरु दिनरात एक गरेर काम गरेका छौं ।
घुस्कीसँगै भारतको घुर्ना बजार नजिकै रहेकोले सर्वसाधारणहरु आउजाउ गरेपनि निषेधाज्ञा जारी भएदिन देखी पूर्ण रुपमा कडाई गरिएको प्रहरी निरीक्षक सुवेदीले बताए । सशस्त्र प्रहरीले इमान्दारीताका साथ काम गरिरहेको उनले बताए । निषेधाज्ञा जारी भएको आज दोश्रो दिन पनि कडा गरिएको उनले बताए ।
कोरोना रोकथाम तथा नियन्त्रणका लागि सशस्त्र प्रहरी सीमा क्षेत्रमा धेरै नै मेहन्त गरेर काम गरिरहेको र यस्तो विषम परिस्थितीमा पनि हामी यस क्षेत्रमा काम गर्न पछाडि नहटेको उनले बताए ।
जनताको सुरक्षा र जीवन रक्षा गर्नु हाम्रो दायित्व र जिम्मेवारी भएकोले सशस्त्र प्रहरीले इमान्दारिताका साथ काम गरिरहेको उनको कथन छ । सर्वसाधारणहरुलाई सम्झाई बुझाई गर्ने गरेको र अटेर गर्नेलाई कार्वाही गर्ने समेत उनले चेतावनी दिएका छन् । सीमा क्षेत्रमा कोही कसैले नियमको उल्लघन गरेकोमा उसलाई कानुन बमोजिम कार्वाही गरिने सशस्त्र प्रहरी निरीक्षक सन्तोष सुवेदी बताउँछन् ।
तथापी हरिनगर गाउँपालिकाको घुस्की, बसन्तपुर क्षेत्रमा सशस्त्र प्रहरीले निगरानी बढाएपछि सर्वसाधारणहरु अत्यावश्यक काम बाहेक हिड्डुल नगरेको र थप कडाई गरेपछि कोही पनि बाहिर ननिस्केको उनले दाबी गरेका छन् ।उनका अनुसार मास्कको प्रयोग, सेनिटाइजरको प्रयोग र सामाजिक दुरी कायम गरी स्वास्थ्य मापदण्डको पालना गर्नुपर्नेमा उनले जोड दिए ।
त्यसैगरी हरिनगर गाउँपालिकामा रहेको सशस्त्र प्रहरी बल नेपाल बीओपी भुटाहा, बसन्तपुर र जनपथ प्रहरीहरुको सक्रियतामा यस पालिकामा पूर्णमा कडाई गरिएको छ । यसलाई जेठ १५ गतेसम्म पूर्ण रुपमा कडाई गरिने हरिनगर गाउँपालिकाले जनाएको छ । निषेधाज्ञालाई सबैले पालना गरेर कोरोनासँग जित्नका लागि उनले अनुरोध गरेको छ ।
