इनरुवा । १ नम्बर प्रदेशका प्रमुख प्रतीपक्षी दलका नेता तथा नेपाली कांग्रेस सुनसरीका सभापति राजीव कोइरालाले देवानगञ्ज गाउँपालिकालाई स्वास्थ्य सामग्री उपलब्ध गराएका छन् ।
सुनसरीको ग्रामिण सीमावर्ती क्षेत्रमा रहेको देवानगञ्ज गाउँपालिकामा कोरोना जोखिम बढ्दै गएको बेला नेपाली कांग्रेस सुनसरी सभापति एवं सुनसरी क्षेत्र नम्बर प्रदेश २(ख) का सांसद समेत रहेका कोइरालाले आफनो क्षेत्रमा स्वास्थ्य सामग्री शुक्रवार गाउँपालिकाका प्रमुख प्रशासकीय अधिकृत चुडामणि गुरागाईलाई स्वास्थ्य सुरक्षा सामग्री उपलब्ध गराएका हुन् ।
केही दिनयता देखी सीमावर्ती क्षेत्रमा कोरोना उच्च जोखिम बढ्दै गएको बेला सुनसरीका सभापति कोइरालाले स्वास्थ्य सुरक्षा सामग्री गाउँपालिकामा नै गएर उपलब्ध गराएको कोइरालाका स्वकीय सचिव कृष्ण कुमार भगतले जानकारी दिए ।
देवानगञ्ज गाउँपालिकामा अहिलेसम्म तीन जनाको कोरोना संक्रमित भएर मृत्यु भइसकेका छन् । कोरोना संक्रमित व्यक्तिहरुलाई थप उपचार गर्न आफू प्रयासरत रहेको र कोरानाको लक्षणहरु देखा परेका व्यक्तिहरुलाई पीसीआर परीक्षणको तयारीमा जुटेको नेता कोइरालाको भनाई छ ।
देवानगञ्ज गाउँपालिकालाई चार हजार मास्क र सेनिटाइजर लगायतको स्वास्थ्य सुरक्षा सामग्री उपलब्ध गराएको नेता कोइरालाले बताए । कोरोनाको महामारीलाई कसैलेपनि बेवास्ता नगरीकन सावधानी अपनाएर बस्नुपर्ने उनले बताए । कोरोना महामारीबाट देवानगञ्ज गाउँपालिकामा तीन जनाको ज्यान गएको प्रति चिन्ता व्यक्त गर्दै उनीहरुप्रति हार्दिक श्रद्धाञ्जली समेत दिएका छन् ।
कोरोना रोकथाम तथा नियन्त्रण गर्नका लागि आफूले तत्काल स्वास्थ्य सुरक्षा सामग्री पालिकालाई उपलब्ध गराएको उनले बताए । आफू पनि बचौं र अरुलाई पनि बचाऔं भन्दै नेता कोइरालाले समयमा सजग र सचेत रहन उनले सबैलाई आग्रह गरेका छन् ।
जिल्लामा लकडाउन भएकाले नियमको पालना गर्न उनले अनुरोध गर्दै समयमै सावधानी अपनाउनु पर्ने नेता कोइरालाले जोड दिदैं यस्तो बिषम परिस्थितिमा सामाजिक दुरी कायम गरी मास्क र सेनिटाइजरको प्रयोग गर्नलाई अनुरोध गरेका थिए ।
देवानगञ्ज गाउँपालिकाका जनप्रतिनिधिहरुलाई जनताको हकमा यस्तो समयमा चौबिसै घण्टा लाग्न अनुरोध समेत गरेका थिए । पालिकाको सर्वदलिय बैठकमा नेता कोइरालाले जनताको पीसीआर परीक्षणको दायरा बढाउन आफू पनि लागेकोले जनप्रतिनिधिहरुले चासो राखेर दुःखको घडीमा जनताको साथमा रहनुपर्नेमा जोड दिए ।
