टोमराज मेहता
इनरुवा । इनरुवा नगरपालिकाका नगरप्रमुख राजन मेहताले जिल्ला अस्पताल इनरुवामा कोभिड अस्पतालको उद्घाटन गरेका छन् ।
जिल्ला अस्पताल इनरुवामा २० बेडको कोभिड अस्पतालको इनरुवा नगरपालिकाका नगरप्रमुख मेहताले आज एक कार्यक्रमकाबीच उद्घाटन गरेका हुन् ।
दोश्रो चरणको कोभिड १९ कोरोना भाइरस रोकथाम र नियन्त्रणका लागि इनरुवा अस्पतालमा २० बेडको कोभिड अस्पताल संचालनका लागि आज विधिवत तरिकाले उद्घाटन गरिएको हो ।
कोरोना संक्रमित बिरामीहरुका लागि अन्यत्र जानु नपर्ने र इनरुवा अस्तपालमा नै उपचार गर्ने गरी कोभिड अस्पताल संचालनमा ल्याएको हो । आज एक कार्यक्रमका बीच उद्घाटन गरिपनि कोभिडका बिरामीहरुलाई मंगलवारदेखी राख्ने अस्पतालले जनाएको छ ।
इनरुवाका नगरप्रमुख राजन मेहताले कोभिड अस्पतालको उद्घाटन गर्दै नगर क्षेत्र लगायतका आसपासका कोभिडका बिरामीहरुका लागि उपचार गर्ने गरी संचालनमा ल्याएको बताए ।
नगरप्रमुख मेहताले अस्पताल व्यवस्थापन समिति, इनरुवा अस्पताल जनस्वास्थ्य कार्यालय सुनसरी, इनरुवा नगरपालिकाको संयुक्त प्रयास र सहयोगमा आज कोभिड अस्पतालमा संचालनमा ल्याएको बताए । उनले भने, ‘मेरो व्यक्तिगत, दर्जा, अहोदा, क्षमता र नगरपालिकाले भ्याएसम्म कोभिड अस्पताललाई सहयोग गर्नेछु ।’
जिल्ला जनस्वास्थ्य सुनसरीका प्रमुख सागर प्रसाई, डाक्टर पुजा दास, अस्पताल समिति अध्यक्षका गोपालराज भण्डारी, सदस्य रामप्रसाद मेहता, तोया गिरी लगायतका सबै सहयोगीहरुलाई उनले धन्यवाद व्यक्त गरेका थिए ।
नगरप्रमुख मेहताले कोरोनाको महामारीलाई सबैले मिलेर सहयोग गर्नुपर्ने बताउँदै उनले कोभिड अस्पताल इनरुवामा सेवा लिन आउने सेवाग्राहीहरुलाई सेवा उपलब्ध गराउनुपर्नेमा जोड दिएका थिए । उनले भने, ‘दुःखको घडीमा कोही हुँदैन, सुखमा सबै हुन्छ । त्यसैले अहिलेको परिस्थितीमा सबै मिलेर सहयोग गरौ ।
कोभिड १९ का बिरामीहरुलाई उपचार गराउने प्रवन्ध मिलाएका छौं, उनले भने, ‘अक्सिजन सहितको सुविधा इनरुवा अस्पतालमा उपलब्ध गराएकोले निर्धक्क भएर कोभिड अस्पतालमा उपचार गर्न गराउन अनुरोध गर्दछु ।
जिल्ला अस्पताल व्यवस्थापन समितिका अध्यक्ष गोपालराज भण्डारीले धेरै प्रयास र पहलबाट जिल्ला अस्पताल इनरुवामा कोभिड अस्पताल संचालनमा ल्याउन सफल भएको बताए । कोभिड अस्पतालबाट प्रभावकारी सेवा प्रवाह गर्न चिकित्सकहरुलाई अनुरोध गर्दै सबैको सहयोगबाट कोभिड अस्पतालको उद्घाटन भएकोले कोभिडका बिरामीहरुलाई उपचार सुरु हुने उनले बताए ।
उधोगा वाणिज्य संघ इनरुवाका अध्यक्ष बीरेन्द्र साहले कोभिड अस्पताल उपचार गर्न आउने कोभिडका बिरामीहरुलाई निःशुल्क खाना खुवाउने बताए । कोभिड अस्पताल इनरुवामा सेवा लिन आउने कोभिडका बिरामीहरुलाई उधोगा वाणिज्य संघ इनरुवाको तर्फबाट कोभिड अस्पताल इनरुवामा काम गर्ने र बिरामीहरुलाई निःशुल्क खाना खुवाउने सुनसरी अनलाइनको कुराकानीमा उनले बताए ।
जिल्ला अस्तपाल व्यवस्थापन समितिका सदस्य रामप्रसाद मेहताले इनरुवा लगायत आसपास क्षेत्रका कोभिड बिरामीलाई उपचार गर्न सहज हुने उद्देश्यले मंगलवारदेखी कोभिड अस्पताल संचालन हुने बताए । डाक्टर, अक्सिजन, आइसीयू, भेन्टीलेटर सहितको सेवा कोभिड अस्पतालबाट प्रवाह हुने उनले बताए । सहयोगी हातहरुलाई धन्यवाद दिदैं सदस्य मेहताले अगामी दिनमा पनि सहयोगको अपेक्षा गरेको उनले बताए ।
इनरुवा कोभिड अस्पतालको उद्घाटन पछि सरकोरवालाहरुले अवलोकन समेत गरेका थिए ।
