इनरुवा । दोश्रो भेरियण्ट सहितको कोभिड १९ कोरोना भाइरस रोकथाम तथा नियन्त्रण गर्नका लागि कोरोना विरुद्ध कुशवाहा राहत संकलन तथा वितरण महाअभियानले बिभिन्न स्वास्थ्य सुरक्षा सामग्री लिएर सर्वसाधारणहरुको घर–घरमा पुग्ने गरेको संयोजक गुनानन्द महतोले बताएका छन् ।
कोरोनाको जोखिम दिनप्रतिदिन बढ्दै गएकोलाई मध्यनजर गर्दै बिराटनगरको बिभिन्न वडाहरुमा गएर गरीब तथा विपन्न व्यक्तिहरुलाई स्वास्थ्य सुरक्षा सामग्री वितरण गर्ने कार्यलाई निरन्तरता दिदै आएको महाअभियानका संयोजक महतोले बताएका हुन् ।
“सके सहयोग गरौ, नसके घरमै सुरक्षित बसौ“ भन्ने मुलनाराका साथ महाअभियानले बिराटनगर १ का गरीब तथा विपन्न वर्गका व्यक्तिहरुलाई स्वास्थ्य सुरक्षा सामग्री प्रदान गर्दै कोरोनाबाट कसरी बच्ने र सुरक्षित रहने बारे समेत सचेतना फैलाउँदै आएको महाअभियानको कार्यक्रममा महानगर समाजका वडाध्यक्ष चन्दन सिङ्ग,अभियन्ता बब्लु मेहता लगायतको सहभागितमा वितरण गरिएको थियो । यस वडामा पहिलो पटक स्वास्थ्य सुरक्षा सामग्री वितरण गरिएकोले संयोजक महतोलाई समाजका अगुवाहरुले स्वागत गर्दै धन्यवाद व्यक्त गरेका थिए ।
समाजका अभियान्ता बब्लु मेहताले गरीब तथा विपन्न समुदायलाई मास्क, सेनिटाइजर र सो समुदायमा राहत वितरण गर्न पाउँदा खुशी लागेको बताए । सो समुदायका सर्वसाधारणहरुले स्वास्थ्य सुरक्षाका समाग्री पाउँदा खुशी हुदै आयोजकलाई धन्यवाद दिएका थिए ।
सोमबार महानगरको १३ र १४ नम्बर वडामा मास्क, सेनिटाईजर र साबुन वितरण गरेको अर्का अभियन्ता तथा महाअभियानका सदस्य रामनारायण मेहताले जानकारी दिए ।
बिराटगर महानगरपालिकाका गरीब तथा विपन्न समुदायको छनौट गरी र कोरोना महामारीको चपेटामा परेकाहरुलाई पहिचान गरी खाद्यन्न सामाग्री समेत उपलब्ध गराउने मेहताले प्रतिवद्धता व्यक्त गरेका छन् ।
