इनरुवा । इनरुवा नगर क्षेत्रमा देखिएको कोरोना महामारी नियन्त्रणतर्फ सक्रियता देखाउँदै इनरुवाका स्थापनाकर्ता एवं भूतपूर्व मन्त्री दिलबहादुर श्रेष्ठका पुत्र क्याबिनेट श्रेष्ठले नगद रु २५ लाख सहयोग गरेपछि उनलाई इनरुवा नगरपालिकाले सम्मान गर्ने भएको छ ।
कोरोनाको दोश्रो लहर चलेपछि सर्वसाधारणहरु अक्सिजन नपाएर ज्यान गुमाउनेको संख्या बढ्दै गएको बेला क्याबिनेट श्रेष्ठले यस्तो बिषम परिस्थितीमा नगर क्षेत्रको जनताको सुरक्षाका लागि २५ लाख दिएर सहयोग गरेकोले नगर प्रमुख राजन मेहताले वहाँलाई धन्यवाद दिदैं सम्मान गर्ने बताएका हुन् ।
कोरोना संक्रमण बढ्दै गर्दा इनरुवा नगरपालिकाले भ्याएसम्मको गतिविधि सञ्चालन गरेपनि केही गतिविधिहरुका बिरुद्ध केही व्यक्तिहरुद्धारा नकारात्मक प्रचार प्रसार भएको र टिकाटिप्पणी भएकोप्रति दुःख व्यक्त गर्दै इनरुवा नगरपालिकाका नगरप्रमुख राजन मेहताले कोरोनाको लडाइमा इनरुवा नगरपालिका इनरुवाबासीको साथसाथ रहेको स्पष्ट पारे ।
दुःखको परिस्थितीमा इनरुवा नगरलाई सहयोग गर्ने क्याबिनेट श्रेष्ठसँगै अन्य सहयोगी हातहरु प्रति मेयर मेहताले अभार प्रकट गरेका छन् ।
आफू नगरप्रमुख भएको चार वर्ष हुन लाग्दा पहिलो पटक व्यक्तिगत रुपमा ठूलो रकम सहयोग गरेको हुदाँ श्रेष्ठलाई इनरुवा नगरपालिकाको तर्फबाट सम्मान गर्ने बताएका हुन् । कोरोनाको महामारी साम्य भएलगतै श्रेष्ठलाई एक कार्यक्रम गरेर सम्मान गर्ने नगरप्रमुख मेहताको कथन छ ।
कोरोनाको लहरमा सम्मान गर्ने स्थिती नरहेको उनले बताए । नगरपालिकामा कोरोना संक्रमणको संख्यापनि बढ्दै गएको बेला जनताको सुरक्षा गर्नु पहिलो दायित्व भएकोले सामाजिक सञ्जालमा अपुष्ट टिका टिप्पणीको बिषय नबनाई दिनका लागि उनले सबैलाई अनुरोध गरेका छन् ।
इनरुवा नगरपालिकाको स्थिती समान्य भएपछि श्रेष्ठलाई सम्मान गर्ने र वहाँले यस्तो परिस्थितीमा देखाएको सहानुभूतिप्रति नगरपालिकाले उच्च मूल्याङ्कन गरेको उनको भनाई छ ।
श्रेष्ठले प्रदान गरेको २५ लाख रुपैयाँ र अन्य सहयोगी दाताहरुले पनि सहयोग गर्ने भएकाले सबै रकम जम्मा गरी एकमुष्ट रकम इनरुवा अस्पतालमा अक्सिजन प्लान्ट स्थापना गर्ने लगायतको कुरामा खर्च गर्ने नगरप्रमुख मेहताले बताए ।
कोरोनाको महामारीमा श्रेष्ठले सहयोग गरेको कार्य प्रशंसायोग्य रहेको नगरप्रमुख मेहताको भनाई छ । नगरपालिकालाई दिएको रकम समयमै सदुपयोग गर्ने र वहाँले जुन प्रयोजनको लागि दिएको छ , त्यही प्रयोजनमा खर्च गर्ने उनले दाबी गरेका छन् ।
इनरुवा नगरपालिकाको कार्यपालिकाको बैठकबाट निर्णय गरेर खर्च गर्ने र अरु सहयोगी दाताहरुले पालिकालाई रकम दिने भएको हुदाँ आफू समन्वय र सहकार्य गरिरहेको मेहताले बताए ।
सामाजिक सञ्जालमा सस्तो लोकप्रियता कमाउनहरुले आफूलाई बदनाम गर्न खोजेको उनले आरोप समेत लगाएका छन् । जनतामा भ्रम फैलाउने र सामाजिक सञ्जालमा गलत प्रचारवाजी गरेर नकारात्मक सन्देश प्रवाह गरेकोप्रति ध्यानाकर्षण समेत भएको उनले बताए ।
