टोमराज मेहता
इनरुवा । सुनसरीको इनरुवा नगरपालिका र हरिनगर गाउँपालिकालाई एसजी अर्गनाइजेशन प्रालिले अक्सिजन सहित स्वास्थ्य सुरक्षा सामग्री हस्तान्तरण गरिएको छ ।
दोश्रो चरणको कोरोना महामारी बेला मानव स्वास्थ्यको ख्याल गरी एसजी अर्गनाइजेशन प्रालिले इनरुवा नगरपालिका र हरिनगर गाउँपालिकाको आइसोलेशन केन्द्रलाई अक्सिजन सहित स्वास्थ सुरक्षा सामग्री हस्तान्तरण गरिएको हो ।
अक्सिजन व्याग ५० थान, सर्जिकल मास्क १ हजार, ४० लिटरको अक्सिजन सिलिन्डर १० थान, १० लिटरको अक्सिजन सिलिन्डर ५ थान, रेगुलेटर १ थान, अक्सिजन मास्क २५ थान, ओसीमिटर ४ थान सामग्री इनरुवा नगरपालिकालाई हस्तान्तरण गरिएको एसजी अर्गनाइजेशन प्रालिले जनाएको छ ।
त्यसैगरी हरिनगर गाउँपालिकालाई अक्सिजन व्याग ५० थान, सर्जिकल मास्क ५ सय, ४० लिटरको अक्सिजन सिलिन्डर ७ थान, १० लिटरको अक्सिजन सिलिन्डर २ थान, अक्सिजन मास्क २० थान, ओसीमिटर ४ थान हस्तान्तरण गरेको प्रालिले जनाएको छ ।
एसजी अर्गनाइजेशन प्रालिका अध्यक्ष शिवप्रसाद घिमिरेले हरिनगर गाउँपालिकाका अध्यक्ष गफार अन्सारी मियाँलाई अक्सिजन सहित स्वास्थ्य सुरक्षाका सामग्री हस्तान्तरण गरेका हुन् ।
एसजी अर्गनाइजेशन प्रालिका अध्यक्ष घिमिरे आफैले इनरुवा नगरपालिका र हरिनगर गाउँपालिका पुगेर सो सामग्री हस्तान्तरण गर्दै कोरोना महामारीको बेला अक्सिजन अभावले कोरोना संक्रमितको ज्यान गइरहेकोले आफूले सर्वसाधारणको ज्यान बचाउनका लागि सामग्री उपलब्ध गराएको बताए ।
हरिनगर गाउँपालिकाका अध्यक्ष अन्सारीले कोरोनाको महामारीमा मानव स्वास्थ्य सुरक्षाका लागि पालिकालाई यस्तो परिस्थितीमा सामग्रीहरु उपलब्ध गराएकोमा एसजी अर्गनाइजेशन प्रालिका अध्यक्ष घिमिरेलाई धन्यवाद ज्ञापन गरेका छन् ।
