मुस्ताक आलम
लौकही । सुनसरीको कोसी गाउँपालिका क्षेत्रमा कृषि तथा कृषकलाई उकास्न त्यहाँका ३२ किसानका लागि गोठतथा खोर निर्माण गरिएको छ ।
परम्परागत रुपले भैसी तथा बाख्रापालन गर्ने किसानहरुलाई नयाँ सुधारीएको गोठ तथा खोर निर्माण गरिदिइएको हो ।
कोसीटप्पु कृषि सहकारी संस्थाको आयोजनामा र प्रदेश सरकारको भूमि व्यवस्था कृषि तथा सहकारी मन्त्रालयको सहयोगमा सक्रिय सबै पशु किसानको घरमा एकै स्तरका गोठ तथा खोर निर्माण गरिएको छ ।
प्रदेश सरकारको भूमि व्यवस्था कृषि तथा सहकारी मन्त्रालयबाट २५ लाख र कोसीटप्पु कृषि सहकारी संस्थाको आठ लाखको लगानीमा गोठ निर्माण गरिएको जनाइएको छ ।
भैँसी र बाख्रापालन गर्न त्यहाँका कृषक तथा पशुपालकले समूह बनाई ४० घरमा बाख्रा र भैँसी पालेका छन् । कृषि क्षेत्रलाई प्रोत्साहन गर्न पहिलो वर्षमा भौतिक निर्माणलाई प्राथमिकता दिएकाले सबै किसानको घरमा नयाँ सुरक्षित गोठ र खोर निर्माण गरिएको हो ।
हेर्दै सुन्दर देखिने बाख्राका खोरहरु निर्माण भएपछि किसानहरु आफ्ना बाख्रा सुरक्षित हुने भए भन्दै हर्षित भएको कार्यक्रम संयोजक कैहकसा अनजुमले जानकारी दिइन् ।
भैसीपालन गर्ने किसानकोमा भैँसीको गोबर सदुपयोग पनि हुने भएर बायोग्याससहित नयाँ गोठ बनेका छन् । कोरोना कहरका कारण सामुहिक कृषि गाउँ निर्माण गर्न कठिनाइ हुँदा केही नयाँ बनाउन ढिलाइ भएको संयोजक अनजुमले बताइन् ।
कोसीमा कृषि गाउँ र प्रदेश, भूमि व्यवस्था कृषि तथा सहकारी मन्त्रालयले ल्याएको किसानमैत्री कार्यक्रम रहेको संयोजक अनजुमले जनाइन् ।
