इनरुवा । मुस्कान सहितको सेवा प्रदान गर्ने लक्ष्य बोकेको नेपाल प्रहरीका एक जवानले बुधवार सफारी चालकलाई निर्घात कुटपिट गरेका छन् ।
बुधवार दिउँसो १ बजे सिटी सफारीमा ग्याँस सहितका समान बोकेर इनरुवा प्रवेश गर्दै गर्दा प्रहरी बिट बसचौकमा कार्यरत रहेका प्रहरी जवानले सिटि सफारी चालकलाई निर्घात कुटपिट गरेको हो ।
भोक्राहा नरसिंह गाउँपालिका–१ का सिटि सफारी चालक सलाउद्धिन अन्सारीले सफारीमा ग्याँस सहितका सामान बोकेर इनरुवा प्रवेश गर्दै गर्दा प्रहरी बिट बसचौक इनरुवामा कार्यरत रहेका प्रहरी जवान बैजनाथ माझीले निर्घात कुटपिट गरेको पीडितले बताएका छन् ।
निषेधाज्ञाको उल्लघन गरेको भन्दै प्रहरी जवान माझीले सिटी सफारी चालकलाई जरिवाना काटेर जान अनुरोध गरेपछि सफारी चालक अन्सारीसँग बादविवाद भएको थियो ।
सिटी सफारी चालक अन्सारीका अनुसार निषेधाज्ञामा धेरै सिटी सफारी चलेपनि जरिवाना नकाटने गरेकोले आफूले पनि जरिवाना नकाटी जान खाजेपछि प्रहरी जवान माझीले सफारी चालकलाई मुक्का, बुट र थप्पडले कुटपिट गर्दा उनको टाउँकोमा गम्भिर चोट लागि उनी घाइते भएका थिए ।
प्रहरी जवान माझीले निर्घात कुटपिट गरेपछि उनको सफारी सहित उनलाई प्रहरी कार्यालय सुनसरीमा पाँचघण्टा नियन्त्रण राखिएको पीडितले बताएका छन् ।
रक्षक भए भक्षक भन्ने जस्तै प्रहरीले घाइते अन्सारीलाई उद्धार गरी उपचार गराउनुको सट्टा जिल्ला प्रहरी कार्यालय सुनसरी लगि पाँचघण्टा नियन्त्रणमा राखेको थियो ।
सफारी चालकको टाउँकोबाट रगत बग्न थालेपनि उसलाई प्रहरी कार्यालयमा थामथुम गर्नका लागि प्राथमिक उपचारको बहानामा नियन्त्रण पछि नेताहरुको फोन आएपछि चालक अन्सारीलाई रिहा गरिएको बताइन्छ ।
निषेधाज्ञामा सबैका लागि कानुन बराबर भएपनि सुनसरी प्रहरीले चालक अन्सारीसँग बिभेद गरी सफारी नियन्त्रणमा लिई उल्टै कुटपिट भएको घटनाबाट के पाठ सिक्न सकिन्छ ? भन्ने प्रश्न उठ्न थालेको स्थानीयहरुले प्रतिक्रिया दिएका छन् ।
यता जिल्ला प्रहरी कार्यालय सुनसरीका प्रहरी नायव उपरीक्षक नरेन्द्र कुमार कार्कीले सिटी सफारी चालकले नै उदण्ड भएर प्रस्तुत भएपछि प्रहरी र चालकबीच विवाद भएको बताए । निषेधाज्ञाको बेला नियम पालना गर्न प्रहरीले भनेपछि मुखमुखै लागेपछि उनीहरु बीच विवाद उत्पन्न भएको उनले बताए ।
प्रहरी जवान माझीलाई प्रहरी बिट बसपार्कबाट जिल्ला प्रहरी कार्यालय सुनसरीमा तानिएको समेत उनले बताए । प्रहरी जवान माझीमाथि छानबिन गरिरहेको र गलत गरेको पाइएमा कार्वाही समेत गरिने जिल्ला प्रवक्ता समेत रहेका कार्कीले बताए ।
पीडित परिवारले बिहिवार पत्रकार सम्मेलनको आयोजना गरी कुटपिट गर्ने प्रहरीलाई कार्वाहीको माग गर्दै आफूलाई न्याय दिलाईदिनका लागि सरोकारवालाहरुलाई समेत अपिल गरेका छन् । टाउँकोमा चोट लागेकोले थप उपचार गर्नुपर्ने भएको हुदाँ आफूसँग उपचार खर्च समेत नभएकोले सम्वन्धित निकायहरुले पहल गरि न्याय दिलाई सहयोग गर्न समेत अपिल गरेका छन् ।
