इनरुवा । सुनसरीको इनरुवा नगरपालिका–६ मा मधेशा स्वास्थ्य चौकीलाई पोषणमैत्री स्वास्थ्य संस्था घोषणा गरिएको छ ।
इनरुवा नगरपालिकामा पहिलो पटक मधेशा स्वास्थ्य चौकीलाई पोषणमैत्री स्वास्थ्य संस्था घोषणा गरिएको हो ।
स्वास्थ्य क्षेत्रको १९ वटा मापदण्ड पुरा गरेपछि इनरुवा नगरपालिकाले मधेशा स्वास्थ्य चौकीलाई पोषणमैत्री स्वास्थ्य संस्था घोषणा गरेको जनाएको छ ।
इनरुवा–६ मा रहेको मधेशा स्वास्थ्य चौकीले इनरुवा नगरक्षेत्रभित्र नै स्वास्थ्य क्षेत्रमा राम्रो काम गरेको र स्वास्थ्य मापदण्ड पुरा गरेकोले पोषणमैत्री स्वास्थ्य संस्था गरेको स्वास्थ्य अधिकृत सन्तोष देवले जनाएको छ ।
इनरुवा नगरपालिकाका नगरप्रमुख राजन मेहताले मधेशा स्वास्थ्य चौकीले समुदायमा नमुन कार्य गरेको भन्दै पोषणमैत्री स्वास्थ्य संस्थाको रुपमा नगरक्षेत्रमै पहिलो पटक घोषणा भएको बताए ।
इनरुवा नगरक्षेत्रभित्र रहेको स्वास्थ्य संस्था मध्ये पोषणक्षेत्रमा उदाहरणीय काम गरेकाले स्वास्थ्य मापदण्ड अनुसार पोषणमैत्री स्वास्थ्य संस्था घोषणा गरेको उनले बताए ।
नगरप्रमुख मेहताले मधेशा स्वास्थ्य चौकीका इन्चार्जदेखी सबै कर्मचारीको सराहनीय कामले पोषणमैत्री स्वास्थ्य संस्था घोषणा भएकोले अगामी दिनमा पनि उदाहरणीय काम गर्न सुझाएका थिए ।
नगरप्रमुख मेहताले फरक प्रसंगमा राजनीतिकमा दाउपेचले विकास सम्भव नहुने बताउँदै विकास सबै मिलेर गर्नुपर्ने बताए । उनले राजनीतिक मुद्धामा अडिग भएर प्रतिस्पर्धा गर्नु उचित हुने बताउँदै व्यक्तिगत रिसिबिईका कारण कसैलाई बदनाम गर्न नमिल्ने बताए ।
जनताले मतदान गरेर जिताएको जनप्रतिनिधिलाई सम्मान गरेमात्र सम्मान पाउने तर्क गर्दै नगरप्रमुख मेहताले पालिकाभित्र विकास भएको हो तर रिसिबिईका कारण विकासै नभएको प्रचारवाजीले केही तत्वहरुले सस्तो लोकप्रियता कमाउन खोजेको बताए ।
इनरुवा नगरपालिकाकी उपप्रमुख जमुना गौतम पोखरेलले इनरुवा–६ का जनतासँग योजनाहरु समावेश गर्न अनुरोध गर्दै केही छुटेका योजनाहरु समेत संकलन गरेकी थिईन् ।
इनरुवा–६ का वडाध्यक्ष कोषराज अधिकारीको अध्यक्षतामा सम्पन्न भएको सो कार्यक्रमा इनरुवा नगरपालिकाका प्रमुख प्रशासकीय अधिकृत डिल्लीराज निरौला, इनरुवा–३ का वडाध्यक्ष कालुराम गुरुङ्ग, ५ का वडाध्यक्ष अञ्जनी पोखरेल, मधेशा स्वास्थ्य प्रमुख शलीन्द्र मेहता, इनरुवा नगरपालिकाका स्वास्थ्य अधिकृत निखिल पोखरेल, मिश्रिलाल मेहता, सन्तोष देव लगायतको सरोकारवालाहरुको सहभागिता रहेको थियो ।
