हरिनगर । सुनसरीको हरिनगर गाउँपालिकाले अगामी आर्थिक बर्ष २०७८÷०७९ को वार्षिक नीति कार्यक्रम तथा बजेट सार्वजनिक गरेको छ ।
हरिनगर गाउँपालिकाले अगामी आर्थिक बर्ष २०७८÷०७९ का लागि ५१ करोड ८६ लाख ४ सय रुपैयाँको बजेट सार्वजनिक गरेको हो । पालिकाकी उपाध्यक्ष रिमझिम कुमारी भगतले विधेयक प्रस्तुत गर्दै टेबुल गरेकी थिईन् ।
बाबा बासुकीनाथ मन्दिर हरिनगरा–४ को सभाहलमा बिहीबार आयोजित आठौँ गाउँसभाबाट ५१ करोड ८६ लाख ४ सय रुपैयाँको बजेट सार्वजनिक गर्दै स्वास्थ्य,शिक्षा र कृषि क्षेत्रलाई बढी प्राथमिकता दिएको छ ।
हरिनगर गाउँपालिकाका अध्यक्ष गफार अन्सारी मियाँको आदेश अनुसार कार्यपालिका सदस्य सुशिल कुमार ठाकुरले ५१ करोड ८६ लाख ४ सय रुपैयाँ बराबरको वार्षिक नीति कार्यक्तम तथा बजेट सार्वजनिक गरेका हुन् ।
हरिनगर गाउँपालीकाले आगामी आर्थिक वर्षको लागि चालु खर्चतर्फ २८ करोड ७० लाख ३९ हजार ८ सय ९० रुपैयाँ र पुँजीगत खर्चतर्फ २३ करोड १५ लाख ६० हजार ५ सय १० रुपैयाँ गरी ५१ करोड ८६ लाख ४ सय रुपैयाँको वार्षिक नीति कार्यक्रम तथा बजेट उनले प्रस्तुत गरेका थिए ।
बजेटमा स्वास्थ्य क्षेत्रलाई प्राथमिकता, “एक वडा एक स्वास्थ्य चौकी”
स्वास्थ्य संस्थाहरुबाट प्रदान गरिने खोप सेवा, सुरक्षित मातृत्व तथा प्रजनन स्वास्थ्य सेवा, पोषण लगायत जनस्वास्थ्य सेवा, उपचारात्मक सेवा लागि आवश्यक औषधी उपलब्ध, गर्भावस्थादेखी जन्मपश्चात उपलब्ध गराइने खोप, भिटामिन ए, पोलियो खोप जस्ता अधारभूत सेवालाई सुनिश्चितता गर्नेछ ।
त्यसैगरि प्राथमिक स्वास्थ्य केन्द्र हरिनगरलाई १५ शैयाको अस्पतालमा स्तरोन्नती गर्ने, “एक वडा एक स्वास्थ्य चौकी” को अवधारणालाई कायम गर्ने, प्राथमिक स्वास्थ्य केन्द्र हरिनगरबाट ल्याब सेवा, एक्स–रे सेवा, भिडियो एक्स–रे सेवा, इसिजि लगायतका सेवा सर्वसुलभ रुपमा उपलब्ध गराउने, स्वास्थ्यमा पहुँच पुर्याउन गाउँपालिकाले एम्बुलेन्स खरिद गर्ने र अति विपन्न परिवारलाई प्राथमिक स्वास्थ्य केन्द्रसम्म निःशुल्क सेवा दिइने, स्वास्थ्य विमा कार्यक्रमलाई प्रभावकारी बनाउन आवश्यक जनशक्ति, उपकरणको व्यवस्था गरिनेछ ।
स्वास्थ्य चौकी भुटाहा र घुस्कीमा वर्थिङ्ग सेन्टर सञ्चालन ल्याउने र सेवा विस्तार गर्ने, बृहत स्वास्थ्य शिविर गर्ने, मोतियाविन्दु भएका ज्येष्ठ नागरिक र महिलाहरुको लागि पिआईडी र आङ्ग खस्ने बिरामीका लागि सरकारी अस्पतालमा समन्वय गरि उपचारको व्यवस्था मिलाउनेछ ।
शिक्षालाई पनि प्राथमिकता, “अध्यक्ष उपाध्यक्ष बेटी पढाउँ कार्यक्रम”
अगामि आर्थिक वर्ष २०७८÷०७९ मा हरिनगर गाउँपालिकाले शिक्षा क्षेत्रलाई पनि बढी प्राथमिकतामा राखेर नीति कार्यक्रम तथा बजेट प्रस्तुत गरिएको छ । त्यसमा शिक्षालाई रोजगारी र उधमशिलतासँग जोडन प्राविधिक र व्यवसायिक शैक्षिक संस्थाको स्थापनाका लागि पहल गरिनेछ ।
विधालय तहको शिक्षामा कम्प्युटर शिक्षालाई प्रोत्साहित गर्न तथा भाषा साहित्यलाई प्रवद्र्धन गर्न हेल्मेट शिक्षक तथा उर्दु शिक्षकको व्यवस्थालाई निरन्तरता दिइनेछ । सामुदायिक विधालयहरुमा अंग्रेजी भाषाको पठनपाठनलाई सहज बनाउन अंग्रेजी बोल्ने र पढने मेसिनको व्यवस्थालाई बिभिन्न विधालयमा व्यवस्थापन गर्नेछ ।
विधालयहरुमा सूचना तथा संचार प्रविधिको प्रयोग र सिकाईलाई प्रोत्साहित गर्नेछ । पालिकाभित्र रहेका विधालय र मदर्शाको लागि आवश्यक भवन, कक्षा कोठा र शौचालयको व्यवस्था अनिवार्य गरिनेछ । शैक्षिक अध्ययन अवलोकन भ्रमणलाई निरन्तरता दिनेछ ।
अध्यक्ष कप खेलकुद प्रतियोगिता र राष्ट्रपति रनिङ्गशिल्ड मार्फत बालबालिकालाई प्रोत्साहित गर्नेछ । हरिनगर गाउँपालिकाभित्र रहेका गरिब जेहन्दार र दलित विधार्थीहरुलाई पोशाक तथा छात्रवृति प्रदान गरिनेछ ।
विधालयमा योग शिक्षा सम्वन्धि कार्यक्रम सञ्चालन ल्याउने नीतिमा कार्यान्वयन गरिनेछ । तीन भन्दा बढी छोरी भएका परिवारलाई “अध्यक्ष उपाध्यक्ष बेटी पढाउँ कार्यक्रम” सञ्चालन गरिने छ भने विधालयमा लिने आन्तरिक शुल्क मिनाहा गरिनेछ ।
कृषिमा हरिनगरको बिशेष प्राथमिकता, ‘एक गाउँ एक प्राविधिक’
गाउँपालिकाले कृषिको विविधीकरण,आधुनिकीकरणमा विशेष प्राथमिकता दिदैं किसानलाई उन्नत बीउविजन र रैथाने बीउ उपलब्ध गराइने तथा वास्तविक किसानको पहिचान गरी अनुदान प्रदान गर्न कार्यविधि बनाएर लागू गर्ने नीति लिएको छ ।
‘एक गाउँ एक प्राविधिक’ कार्यक्रमलाई प्रभावकारी ढङ्गले कार्यान्वयनमा ल्याइने नीति गाउँपालिकाको छ । पालिकाभित्र उत्पादन हुने कृषि उपजको व्यवस्थापन गर्न हरिनगर–१ म अत्याधुनिक प्रविधिको गोदामघर निर्माण कार्यलाई बढी प्राथमिकता दिइनेछ ।
त्यसैगरि हरिनगर गाउँपालिकाको सातवटै वडाका उत्कृष्ट किसान तथा पशुपालकलाई सम्मान तथा पुरस्कार प्रदान गरिनेछ । किसानहरुलाई कृषि औजार वितरण समेत गरिने पालिकाले नीति कार्यक्रम तथा बजेटमा उल्लेख गरिएको छ ।
त्यसैगरि हरिनगर गाउँपालिकाभित्र फोहोर व्यवस्थापन गर्नका लागि ल्याण्डफिल्ड साईड बनाइनेछ । कर्मचारी व्यवस्थापन तथा फोहोर बोक्ने टयाक्टर र ट्रेलर अगामि आर्थिक वर्ष खरिद गरिने योजनामा उल्लेख गरिएको छ ।
पत्रकारलाई पुरस्कार प्रदान गरिने
त्यसैगरि सुशासन तथा संस्थागत क्षमता अभिबृद्धि कार्यक्रम अन्र्तगत गाउँपालिकाको विकास निर्माणको संचार तथा खोज पत्रकारिताको माध्यमबाट सकारात्मक योगदान गर्ने, मर्यादित र सदाचार उत्कृष्ट पत्रकारलाई पुरस्कार प्रदान गरिने नीति कार्यक्रममा ल्याइएको छ । उत्कृष्ट पत्रकारलाई पुरस्कार प्रदान कार्यक्रम चार वर्षपछि पहिलो पटक योजना तथा बजेटमा समावेश गरिएको हो ।
