संगम विष्ट
चतरा । वराहक्षेत्र नगरपालिका वडा नम्बर–२ को वडा कार्यालयसंग समन्वय गरेर देशकै पहिलो स्वास्थ्य बिमायुक्त वडा घोषणाको अन्तिम तयारीमा रहेको प्राथमिक स्वास्थ्य केन्द्र चतराले पूर्ण बिमायुक्त वडा घोषणा कार्यक्रमका लागि संयोजकमा अमर कट्वाललाई जिम्मेवारी दिएको छ ।
पूर्ण बिमायुक्त वडा घोषणा कार्यक्रमका सल्लाहकार रहेका कट्वाललाई केन्द्रको व्यवस्थापन समितिको बैठकले उनलाई संयोजकको जिम्मेवारी दिएको हो ।
सुनसरीको वराहक्षेत्र नगरपालिका वडा नम्बर–२ पूर्ण स्वास्थ्य बिमायुक्त वडा घोषणाको अन्तिम चरणमा पुगेको छ ।
असार मसान्तसम्म बराहक्षेत्र–२ लाई देशकै पहिलो बिमायुक्त वडा घोषणा गर्ने योजना अनुसार काम अगाडी बढेको प्राथमिक स्वास्थ्य केन्द्र चतराका निर्देशक डाक्टर अनिल गिरिले बताए ।
६ हजार ४ सय ९६ जनसंख्या रहेको वडामा हाल सम्म ६ हजार १ सय ६८ जनाले स्वास्थ्य बिमा गरेका छन् । ९४ दशमलव ८९ प्रतिशतले बिमा गरेको तथ्यांक रहेको वडामा १ हजार ७ सय २७ परिवारले बिमाको कार्ड उपलब्ध गरिसकेका छन् ।
सत् प्रतिशत बिमा गराउने योजना अनुसार प्राथमिक केन्द्रका कर्मचारी र बिमा अभिकर्ताहरु घरदैलौ कार्यक्रम गरेर स्वास्थ्य बिमाको महत्व र बिमा नगराउने परिवारको कारण सर्वेक्षण लिई रहेका छन् ।
असारसम्म कम्तिमा तीन पटक घर–घरमा पुगेर स्वास्थ्य बिमा नबिकरण, नयाँ स्वास्थ्य बिमा कार्ड बनाउन आग्रह , जेष्ठ नागरिक र रातो कार्ड हुने फरक क्षमता (अपाङ्गता ), भएकाले निःशुल्क पाउने स्वास्थ्य बिमाको जानकारी सहित बिपन्ताका कारण स्वास्थ्य बिमा गराउन समस्या भएको परिवारको तथ्यांक खोजि समेत गरि रहेको डाक्टर गिरिले बताए ।
बिपन्न परिवारलाई सहज रुपमा अस्पतालसम्म पुराउन महत्वपूर्ण योजना रहेको स्वास्थ्य बिमा कार्यक्रम प्राथमिक स्वास्थ्य केन्द्रको अथक प्रयासले नेपालमै पहिलो पटक वडा–२ लाई स्वास्थ्य बिमायुक्त वडा घोषणाको अन्तिम चरणमा रहेको स्वास्थ्य केन्द्रका व्यवस्थान समिति अध्यक्ष समेत रहेका बराहक्षेत्र नगरपालिका वडा नम्बर–२ का वडाध्यक्ष अध्यक्ष हरिकृष्ण भट्टराईले बताए ।
स्वास्थ्यको पहुँचसम्म पुग्न आर्थिक अवस्था बाधक नबनोस भनेर बिमालाई प्राथमिकतामा राखेको वडाले सवै वडाबासीहरुले बिमा गराउने र सवैको स्वास्थ्य क्षेत्रमा पहुँच पुग्ने संन्देश वडा नम्बर–२ बाट मुलुकभरी नै दिन खोजेको भट्टराईले बताए ।
