इनरुवा । बहिरा हित तथा संरक्षण समाज सुनसरीको प्रथम अधिवेशनबाट नयाँ नेतृत्व चयन गरेको छ । सुनसरी जिल्लामा रहेका बहिराहरुको हक अधिकारका लागि बहिरा हित तथा संरक्षण समाजले तेस्रो साधारणसभा तथा प्रथम अधिवेशनबाट नयाँ नेतृत्व चयन गरेको हो ।
इनरुवा नगरपालिकाको सभा हलमा भएको बहिरा हित तथा संरक्षण समाजको तेस्रो साधरण सभा तथा प्रथम अधिवेशनले इनरुवाका अरसद मियाँलाई अध्यक्ष पदमा चयन गर्दै ९ सदस्यीय कार्यसमिति चयन गरेको बहिरा हित तथा संरक्षण समाजले जनाएको छ ।
कार्यसमितिमा उपाध्यक्ष सुजन गच्छदार, महासचिव हरिबहादुर सुवेदी, कोषाध्यक्षमा क्षितिज भगत चयन भएका छन । सदस्यहरुमा नितेस मेहता, मन्दिरा दाहाल, अमन सिह, आरिफ अन्सारी चयन भएका छन् ।
इनरुवा नगरपालिकाका नगर प्रमुख राजन मेहताले बहिरा व्यक्तिहरुले भोग्नु परेको समस्यालाई आफूले समाधान गर्ने प्रतिवद्धता व्यक्त गरेका छन् । प्रथम अधिवेशनको प्रमुख अतिथि समेत रहेका नगर प्रमुख मेहताले बहिरा व्यक्तिहरुका लागि सीप मुलक कार्यक्रम लगायत शिक्षा क्षेत्रमा आफूले ठोस योजना ल्याउने प्रयासमा रहेको बताए ।
बहिरा हित समाज सुनसरीले बहिरा व्यक्तिहरुको तथ्याङ्क संकलन गरेर नगरपालिकालाई दिए आफूले उनीहरुको लागि आत्मनिर्भर बनाउनका लागि कुनै कसर बाँकी नराख्ने बताउँदै नगर प्रमुख मेहताले बहिरा व्यक्तिहरुलाई सम्मान गरिने समेत बताए ।
साँकेतिक भाषा अभावका कारण उनीहरुलाई पर्न गएको समस्याप्रति आफू चनाखो भएको समेत उनले बताए ।
नगरपालिका यस विषयमा गम्भिर रहेको उनले बताउँदै उनीहरुको क्षमता विकास र रोजगारका लागि आफूले पहल गर्ने समेत बताए ।
अध्यक्ष अरसद मियाँले अधिवेशनबाट स्थानिय तहको सरकारले सांकेतिक भाषाको प्रशिक्षण संचालन गर्ने व्यवस्था मिलाउनु पर्ने, इनरुवामा बहिराहरुको हक अधिकारको सम्मान र इनरुवामा एकजना दोभाषेको व्यवस्था मिलाउनुपर्ने लगायतका मागहरु अघि सारेको छ ।
