इनरुवा । सुनसरीको हरिनगर गाउँपालिका–६ घुस्कीमा अवैध लागूऔषध सहित दुई जनालाई सीमा सुरक्षा प्रहरी बल नेपाल वीओपी घुस्कीले पक्राउ गरेको छ ।
हरिनगर–६ घुस्की चेकपोस्ट मातहतमा रहेको फर्वाड चेकपोष्ट घुस्कीबाट खटिएको सशस्त्र प्रहरीको टोलीले चेकचाँच गर्ने क्रममा लागूऔषध सहित दुईजनालाई पक्राउ गरेको हो ।
फर्वाड चेकपोष्ट घुस्कीका सप्रसनि सुवास थापाको नेतृत्वमा तीनजनाको टोलीले मोटरसाईकलमा सवार भएका दुई जनामाथि शंका लागेपछि चेकजाँच गर्दा लागूऔषध बरामद भएपछि उनीहरुलाई नियन्त्रणमा लिएको सशस्त्र प्रहरी बल नेपाल वीओपी घुस्कीका सशस्त्र प्रहरी निरीक्षक सन्तोष सुवेदीले जानकारी दिए ।
भारतबाट नेपालतर्फ आउँदै गरेको प्र.न.१–०२–०४० प ४७२४ नम्बरको होण्डा साईन मोटरसाईकलमा डायलेक्स डीसी एक सय एमएलको चार बोतल, स्पास्पो प्रोसिभेन प्लस १२ पतामा १९२ पीस, नगद पाँच हजार एक सय ४० रुपैयाँ, कि प्याड मोवाइल तीन थान, नागरिकता र एटीएम १÷२ थान, सेतो अण्डा एक क्यारेट, प्लाष्टिक ग्लास र प्लेट २४÷२४ पीस र प्र.न.१–०२–०४० प ४७२४ नम्बरको होण्डा साईन मोटरसाइकल एक थान बरामद गरी इलाका प्रहरी कार्यालय हरिनगरलाई जिम्मा लगाइएको सशस्त्र प्रहरी निरीक्षक सुवेदीले बताए ।
लागूऔषध सहित पक्राउ पर्नेहरु सुनसरीको बर्जु गाउँपालिका–१ का २८ वर्षिय रविन गुरुङ्ग र सोही ठाउँका ३७ वर्षिय चौठानन्द राय रहेका छन् । उनीहरुले हेलमेट र जीउमा आगूऔषध लुकाएर ल्याउँदै गर्दा घुस्की चेकपोस्टमा चेकजाँच गर्दा सशस्त्र प्रहरीले बरामद गरेको हो । पक्राउ पर्नेहरुमा गुरुङ्ग र रायलाई अनुसन्धान गरी कार्वाही हुने जिल्ला प्रहरी कार्यालय सुनसरीले जनाएको छ ।
