इनरुवा । कृषि ज्ञान केन्द्र सुनसरीबाट संचालित कृषि कार्यक्रममा र कृषि अनुदानमा टाठाबाठा र पहुँचवालाको हालिमुहाली रहेको कारण वास्तविक किसानले सेवा पाउन सकेको छैन् ।
कृषि उत्पादन बृद्धि गर्ने उद्देश्यले संघिय र प्रदेश सरकारले कृषि ज्ञान केन्द्र सुनसरीलाई प्रदान गरेको बजेटमा कृषि कार्यक्रम र अनुदानको नाममा चरम दुरुपयोग भएको स्थानीय किसानहरुले आरोप लगाएका छन् ।
सुनसरीका किसानहरुका लागि आएको कृषि कार्यक्रम र अनुदानमा कृषि ज्ञान केन्द्र सुनसरीका केही कर्मचारी र बिचौलिया कृषक समुहको मिलोमतोमा आवश्यक प्रक्रिया नै नपुगाई करोडौं रकम सकिएको छ ।
कृषि ज्ञान केन्द्र सुनसरीका केही कर्मचारी आर्थिक प्रलोभनमा परी नाममा मात्रै सिमिति रहेका जिल्लाका केही कृषक समुह र कृषि क्षेत्रका केही माफियाहरुसँग मिलेमतो गरी वास्तविक किसानलाई जानकारी नै नदिई आवश्यक कागजी प्रक्रिया पुरा गरी गत आर्थिक बर्ष २०७७।०७८ मा धान उत्पादन प्रवद्र्धन कार्यक्रमका लागि आएको १ करोड १० लाखबढी रकम खर्च गरेको देखिन्छ ।
विगत केही बर्षयता कृषि ज्ञान केन्द्र सुनसरीले प्रभावकारिताको आधारबिना नै पहुँचको भरमा मनलाग्दी रुपमा अनुदान वितरण गर्दै आएको छ ।
अनुदानको पारदर्शिताको बिषयमा प्रभावकारी अनुगमन नहुँदा बितरण भएको भनिएको करोडौं रुपैयाँको कुनै स्थानमा लेखाजोखासम्म छैंन । कृषि ज्ञान केन्द्र सुनसरीबाट वितरण गरिएको भनिएको अनुदानको नाममा चरम दुरुपयोग भएको जानकारहरुको भनाई छ ।
कृषि ज्ञान केन्द्र सुनसरीका कर्मचारीहरुले मिलोमतो गरी सानो रकमको अनुदानमा ‘सानै रकम’ र ठूलो अनुदानमा ‘ठूलै रकम’ कर्मचारी, केही कृषि क्षेत्रका माफिया र परामर्शदार्ताहरुले खाँदै आएका छन् । कृषि ज्ञान केन्द्र सुनसरीमा रकमको लेनदेन गरी सक्कलीभन्दा पहुँचवाला नक्कली किसानको पोल्टामा अनुदान प्रवाह हुँदै आएको जानकार किसानहरुले आरोप लगाएका छन् ।
‘कमिशन’ नबुझाउँदासम्म निम्न स्तरका र पहुँच नभएका किसानले अनुदान नै पाउँदैंनन् । कृषिजन्य बस्तुको सुरुआति उत्पादनदेखि प्रशोधन तथा बजारीकरणसम्मका चरणमा सरकारले उपलब्ध गराउने ‘अनुदान’ बहालवाला र सेवा निवृत कर्मचारी, शिक्षक, पत्रकार देखि राजनीतिक पहुँचका आधारमा सिमिति समूहको कमाई खाने ‘भाँडो’ भएको छ ।
कृषि ज्ञान केन्द्र सुनसरीबाट प्रदान गरिने अनुदानमा टाठाबाठा र पहुँचवालाको हालिमुहाली रहेकोले बास्तविक किसान मार्कामा परेको यहाँका किसानहरुको भनाई छ ।
अबको केही दिन भित्रमा अनुगमन गरी कषि अनुदान लिएर कोही कसैले दुरुपयोग गरेको पाईएमा कार्वाही गर्ने योजना रहेको कृषि ज्ञान केन्द्र सुनसरीका प्रमुख नुनुलाल उराँवले जानकारी दिए ।
