गणेश यादव
इनरुवा । सुनसरीको इनरुवामा जनप्रतिनिधि सहित निजामती कर्मचारीले सरसफाई गरेर नेपाल निजामती कर्मचारी युनियन स्थापना दिवस मनाएका छन् ।
नेपाल निजामती कर्मचारी युनियन स्थापना दिवसको अवसरमा आयोजित सरसफाई कार्यक्रममा इनरुवा नगरपालिकाका नगर प्रमुख राजन मेहता सहित नेपाल निजामती कर्मचारी युनियनका कर्मचारीहरुले सरसफाई गरेर नेपाल निजामती कर्मचारी युनियन स्थापना दिवस मनाएका हुन् ।
सरसफाई कार्यक्रमलाई सम्वोधन गर्दै इनरुवाका मेयर मेहताले कार्यपालिकामा बहुमत नभएका कारण चारवर्षको अवधिका धेरै काम गर्न नसकेको बताए । इनरुवा वडा नम्बर–२ मा २१ गते हुने वडा अधिवेशनमा सर्व सहमतिबाट नेतृत्व चयन गर्नुपर्ने उनले जोड दिदैं अधिवेशनलाई सफल पार्न सबैलाई अनुरोध गरेका थिए । प्रदेशमैभरी सकारात्मक सन्देश प्रवाह गर्न पनि वडा अधिवेशन सहमतिमै सम्पन्न गर्नुपर्ने नगरप्रमुख मेहताका कथन छ । युवा पुस्ताका लागि नेपाली कांग्रेसको लागि भएपनि सहमतिमा नेतृत्व चयन गर्नुको विकल्प नरहेको उनले बताए ।
इनरुवा नगरपालिका वडा नम्बर–२ को मगर टोलमा नगर प्रमुख सहित नेपाल निजामती कर्मचारी युनियनका कर्मचारीहरुले निर्माण भएको स्ट्रीट पार्कमा कुचो लगाएर सरसफाइ गरेका हुन् ।
कार्यक्रममा इनरुवा नगरपालिकाका प्रमुख राजन मेहता, नेपाल निजामती कर्मचारी युनियनका अध्यक्ष निखिल पोखरेल, नेपाल निजामती कर्मचारी युनियनका कार्यवाहक अध्यक्ष महिचंन साह, नेपाली कांग्रेस इनरुवा–२ का वडा सभापती भुपेन्द्र सिंह यादव, नेपाल मगर संघ जिल्ला कार्य समिती सुनसरीका जिल्ला अध्यक्ष शशी थापा मगर, समाजसेवी देबु सुतिहार,नेपाल रेडक्रसका जिल्ला शाखा भोलेन्टियर संतोश शर्मा, सुजित राणा मगर,सुर्यनारायण साह,हिमाल थापा मगर,आलोक थापा मगर,हिरा साह,नेपाल निजामती कर्मचारी युनियनका कर्मचारी लगायत स्थानियहरुको उपस्थिती रहेको थियो ।
नेपाल निजामती कर्मचारी युनियनका कार्यवाहक अध्यक्ष महिचन साहले नेपाल निजामती कर्मचारी युनियनको बिगतका इतिहास बारे स्मरण गराएका थिए । नेपाल निजामती कर्मचारी युनियनले स्थापना दिवसको अवसर आज बेलुका ६ बजे इनरुवाको लोकतान्त्रिक चौकमा दिप प्रज्वलन गर्ने भएकोले सहभागीको लागि सबैलाई अनुरोध गरेका छन् । नेपाल निजामती कर्मचारी युनियन सुनसरीका अध्यक्ष निखिल पोखरेलको अध्यक्षतामा कार्यक्रम सम्पन्न भएको छ ।
