टोमराज मेहता
इनरुवा । सुनसरीको इनरुवा नगरपालिकाका नगरप्रमुख राजन मेहताले गत आर्थिक वर्षमा पाँच सय भन्दा बढी घरपरिवारको निःशुल्क स्वास्थ्य बिमा गरेका छन् ।
इनरुवाका नगरप्रमुख मेहताले आफनो तलब भत्ता र पारिश्रमिकको रकमबाट गत आर्थिक वर्ष २०७७÷०७८ मा पाँच सय भन्दा गरिब तथा विपन्न घरपरिवारको निःशुल्क स्वास्थ्य बीमा गरेका हुन् ।
चारवर्ष अघि नेपाली कांग्रेस पार्टीबाट टिकट पाएर इनरुवाका मेयर पदमा चुनाव लड्दै गर्दा घोषणा पत्रमा उल्लेख गरिएका बुदाँलाई कार्यान्वयन गर्दै इनरुवाका नगरप्रमुख मेहताले जनतासँग गरेको वाचालाई पुरा गर्दै जनताको मन जित्न सफल भएका छन् ।
कोशी गाउँपालिकाका अध्यक्ष ऐयुब अन्सारीको समन्वय र समाजसेवी हजरत मंसुरीको सहकार्यमा कोशी–२ मा उराँव टोलको ५७ घर परिवारलाई निःशुल्क स्वास्थ्य बीमा इनरुवाका नगरप्रमुख मेहताले गरेका छन् भने उनीहरुलाई बीमा कार्ड समेत हस्तान्तरण गरेका छन् ।
कोशी गाउँपालिका–२ मा आयोजित बीमा कार्ड हस्तान्तरण कार्यक्रममा इनरुवाका नगरप्रुमख मेहताले गत आर्थिक वर्षमा पाँच सय भन्दा बढी गरिब तथा विपन्न परिवारको निःशुल्क स्वास्थ्य बीमा गर्ने क्रममा कोशीका जनताको लागि पनि आफूले बीमा गरिएको बताए ।
स्वास्थ्य क्षेत्रमा गरिब तथा विपन्न परिवारको पहुँच नभएका र आर्थिक समस्याका कारण स्वास्थ्य बीमाबाट बञ्चित हुन नदिनका लागि आफूले गरिव तथा विपन्न परिवारको बीमा गरिएको इनरुवाका नगरप्रमुख मेहताको भनाई छ ।
इनरुवा नगरक्षेत्रमा पनि गत आर्थिक वर्षमा साढे चारसय भन्दा बढी घरपरिवारको निःशुल्क स्वास्थ्य बीमा गरिएको र स्वास्थ्य बीमाबाट एक वर्षमा एक लाख बराबरको उपचार गर्न सहज हुने उद्देश्यले आफूले पारिश्रमिकको रकम स्वास्थ्य बीमामा खर्चिएको नगर प्रमुख मेहताले सुरसेर दैनिकसँगको कुराकानीमा बताए ।
यस अघि इनरुवा नगरपालिकाबाट ५७ जना अपाङ्गता भएका व्यक्तिहरुलाई र एक सय भन्दा बढी यातायात मजदुरहरुको निःशुल्क स्वास्थ्य बीमा कार्ड वितरण गरिएको थियो । नगरप्रमुखको तलब भत्ता र पारिश्रमिकबाट कोशीका ५७ घरपरिवार, नगर क्षेत्रभित्र साढे चारसय भन्दा बढी गरेर गत आर्थिक वर्षमा पाँच सय भन्दा बढी घरपरिवारको निःशुल्क स्वास्थ्य बीमा कार्ड वितरण गरिएको स्वास्थ्य बीमा इनरुवाका दर्ता सहयोगी वहाब अन्सारीले जानकारी दिए ।
यस अघि पनि इनरुवाका नगरप्रमुख मेहताले “मानवताको सेवा, जीवनको सर्वोत्तम कार्य
हो” भन्ने मूल नाराका साथ इनरुवा–९ बवियाका महिला स्वास्थ्य स्वंयसेविकाहरुलाई साइकल समेत वितरण गरेका थिए ।
कोशी गाउँपालिकाका अध्यक्ष ऐयुव अन्सारीले छिमेकी नगरपालिकाले कोशीका जनताको स्वास्थ्य क्षेत्रमा पहुँच हुनका लागि निःशुल्क स्वास्थ्य बीमा गरिदिएकोले इनरुवा नगरप्रमुख मेहतालाई धन्यवाद दिएका छन् । उनका अनुसार स्वास्थ्य समस्या आएमा स्वास्थ्य बीमा कार्ड लिएर अस्पतालमा उपचार गराउन सहज भएको छ ।
निःशुल्क स्वास्थ्य बीमा गरेर छिमेकी पालिकाको सम्वन्धलाइ अझै मजबुद बनाएको भन्दै कोशीका अध्यक्ष अन्सारीले अगामी दिनमा पनि सहमति, सहकार्य र एकता कायम हुने विश्वास व्यक्त गरेका छन् ।
कोशी–२ मा उराँव टोलका ५७ घरपरिवारले निःशुल्क स्वास्थ्य बीमा कार्ड पाएकोमा उनीहरु खुशी हुँदै नगरप्रमुख मेहता, कोशीका अध्यक्ष अन्सारी र समाजसेवी हजरत मंसुरीलाई धन्यवाद दिएका छन् ।
