इनरुवा । नेपाली कांग्रेस इनरुवा नगरका सभापति राजन मेहताले नगरको सभापतिमा पुनः उम्मेदवारी दिने घोषणा गरेका छन् । नेपाली कांग्रेसको १४ औं महाधिवेशनको नगर अधिवेशनमा आफनो पुनः नगर सभापतिमा उम्मेदवारी दिने घोषणा गरेका हुन् ।
नेपाली कांग्रेस जिल्ला पार्टी कार्यालय सुनसरीमा इनरुवाका १० वटाकै नवनिर्वाचित वडासभापतिलाई सम्मान गर्ने कार्यक्रमलाई सम्वोधन गर्दै नगर सभापति मेहताले आफनो उम्मेदवारीको घोषणा गरी एक पटक पुनः नगर सभापति पदमा सर्वसहमतिबाट चयन गर्न सबैलाई अनुरोध गरेका छन् ।
इनरुवा नगरपालिकाका नगर प्रमुख समेत रहेका मेहताले वडा अधिवेशनबाट नवनिर्वाचित वडा सभापतिहरुलाई सम्मान गरेका छन् । नगर प्रमुख मेहताले नेपाली कांग्रेस पार्टीको संगठनलाई बलियो बनाई नेतृत्वमा पुगाउन सहयोग गरेको बताए । भदौ २७ गते हुने नगर अधिवेशनमा पुनः एक पटक नगर सभापतिको जिम्मेवारी सम्हाल्न आफू तयार रहेकोले सबै क्षेत्रिय प्रतिनिधिहरु, अग्रज नेताहरु, नेपाली कांग्रेसका शुभचिन्तकहरुलाई सहयोगका लागि अपिल समेत गरेका छन् ।
इनरुवा नगर क्षेत्रमा कांग्रेसको संगठन कमजोर भएको बेला नगर सभापति मेहताले कांग्रेसको संगठन बिस्तार गर्दै बलियो बनाउनका लागि मेहनत गरी कांग्रेस पार्टीलाई मजबुत बनाएको दाबी गरे ।
इनरुवा नगर क्षेत्रका १० वटै वडा सभापतिहरुलाई बधाई तथा शुभकामना व्यक्त गर्दै नगर सभापति मेहताले नेपाली कांग्रेसको सरकार भएकोले इनरुवा नगरसभापति पदमा केही व्यक्तिहरुले नेतृत्व गर्न खोज्नु स्वभाविक भएको बताए । नेपाली कांग्रेसका इनरुवा नगरसभापति पदका आंकाक्षी हुनु स्वभाविक हो, उनले भने,‘ कांग्रेसलाई बलियो बनाउने समयमा हराएका व्यक्तिहरुले आज नेतृत्व गर्न खोज्नु हास्यस्पद भएको छ ।
कमजोर नेतृत्वका कारण संगठनलाई धक्का पुग्ने भएकाले आफूलाई नै एक पटक पुनः नगर सभापतिको जिम्मेवारी मेहताले दिनुपर्नेमा जोड दिएका छन् । लोकतन्त्रको बेला पार्टीको संगठनलाई बलियो बनाउन आफूले भूमिका निर्वाह गरेको र गणतन्त्र आएको बेला कसैले इच्छा गरेर नेतृत्व सम्हाल्न तयार हुनु अपच भएकोले उनले टिप्पणी गरे ।
नगरप्रुमख मेहताले नगरको सभापति भएर कांग्रेसका संगठनलाई बलियो बनाउने, स्थानीय तहको निर्वाचनमा कांग्रेसका उम्मेदवारीहरुलाई बिजयी बनाउने, पार्टीका गतिविधिहरुलाई अघि सार्ने, युवाहरुलाई समावेशी ढङ्गले अगाडी बढाउने र सबै जातजाति, धर्म, संस्कति, परम्परा, रितिरिवाज र पहिचान कायम हुने गरी सम्मान र अवसर प्रदान गर्ने समेत बताए ।
