भोक्राहा । सुनसरीको भोक्राहा नरसिंह–१ मा नेपाली कांग्रेसको १४ औं महाधिवेशन अन्तरगर्त भदौ २१ गते सम्पन्न भएको निर्वाचन धाँधलीपूर्ण भएको भन्दै कांग्रेसका एकपक्षले आरोप लगाउँदै निर्वाचन पुनः गराउनुपर्ने माग गरेको छ ।
भोक्राहा नरसिंह वडा नम्बर–१ मा नेपाली कांग्रेस भोक्राहा नरसिंहका सभापति युवराज दाहाल, शारदा माविका शिक्षक, राहत शिक्षक केन्द्रका नेता तथा क्षेत्रीय प्रतिनिधिका उम्मेदवार समेत रहेका कृष्णराज विष्ट लगायतका कांग्रेसका एक पक्षले एकलौटी ढङ्गबाट निर्वाचन गराएको भन्दै पुनः निर्वाचन गराउनुपर्ने माग गरेको हो ।
भोक्राहा नरसिंह–१ का नेपाली कांग्रेसका क्रियाशिल सदस्यहरुले एकपक्षीय ढङ्गबाट चुनाव गराएको भन्दै निर्वाचन रद्द गरी पुनः निर्वाचनको माग जारी प्रेस विज्ञप्तिमा उल्लेख गरिएको छ । कांग्रेसका एक पक्षका उम्मेदवारीहरुलाई प्रभावमा पारी मतदन अधिकृतले मनोमानी ढङ्गबाट एकलौटी तरिकाबाट निर्वाचन प्रक्रिया अगाडी बढाएको र अर्को पक्षको मनोनयन पत्र दर्ता नगरी निर्वाचन प्रक्रिया पुरा गरी निर्वाचन सम्पन्न गरेकोले कुनै पनि हालतमा स्वीकार नगर्ने बताइएको छ ।
क्षेत्रिय प्रतिनिधिहरु कृष्णराज विष्ट, मतदान केन्द्रकै सहायक मतदान अधिकृतमा खटिन सिफारिस भएकी शिक्षिक चम्पा मेहता र बाल विकासकी साका गोमा खड्का नेपाल सरकारको कर्मचारी भएकोले निजहरुको उम्मेदवारी रद्द गर्नुपर्ने माग राख्दै सामुहिक निवेदन दर्ता गराएपनि कुनै पनि सुनवाई नभएको प्रेस विज्ञप्तिमा भनिएको छ ।
भोक्राहा नरसिंह–१ मा निर्वाचित भएको वडा सभापति र क्षेत्रिय प्रतिनिधिहरुलाई गाउँपालिका, क्षेत्र,प्रदेश र जिल्लाको अधिवेशनमा उनीहरुलाई भाग लिन नदिने र जवरजस्ती गरेमा उनीहरुलाई भौतिक कार्वाही गर्ने अर्का पक्षका कांग्रेसी क्रियाशिल सदस्यहरुले चेतावनी समेत दिएका छन् ।
यता नेपाली कांग्रेस भोक्राहा नरसिंहका सभापति युवराज दाहालले सहायक मतदान अधिकृतमा ममता मेहता र दिवा झा रहेकोले उनीहरुले लगाएको आरोप निराधार भएको बताए । निर्वाचन नियम संगत भएकोले कुनै प्रकारको धाँधली नभएको उनले बताए । नेपाली कांग्रेसको लोकतान्त्रिक पद्धतिलाई स्वीकार गर्न सिक्नुपर्छ उनले भने, ‘हार हुने वितिकै निर्वाचनलाई नमान्नु लोकतान्त्रिक पद्धतिलाई धज्जी उडाउनु हो । ’
