इनरुवा । नेपाल विद्यार्थी संघका केन्द्रीय अध्यक्ष राजीव ढुङ्गानाले पूर्व प्रधानमन्त्री तथा नेकपा एमालेका अध्यक्ष केपी शर्मा ओलीको दम्भका कारण नेपाली कांग्रेस नेतृत्वमा सरकार निर्माण भएको बताएका छन् ।
सुनसरीको इनरुवामा आयोजित एक कार्यक्रमलाई सम्वोधन गर्दै नेविसंघका केन्द्रीय अध्यक्ष राजीव ढुङ्गानाले ओलीका दम्भका कारण मुलुकलाई वर्वाद पारेको बताएका हुन् । नेपाली कांग्रेसको १४ औं महाधिवेशन चलिरहेको बेला देश दौडाहामा निस्केका नेविसंघका अध्यक्ष ढुङ्गाना सुनसरीकको इनरुवा आइपुगेको थियो ।
इनरुवाका नवनिर्वाचित पदाधिकारीहरुलाई सम्मान तथा पदस्थापना कार्यक्रमलाई सम्वोधन गर्दै नेविसंघका अध्यक्ष ढुङ्गानाले कांग्रेसको मुलमन्त्र सहमति, सहकार्य र एकतालाई कायम गरेर नगर अधिवेशनलाई सफलतापूर्वक सम्पन्न गराउन सबैलाई अनुरोध गरेका थिए ।
नेविसंघका अध्यक्ष ढुङ्गानाले पूर्व प्रधानमन्त्री ओली नेतृत्वबाट पाठ सिक्नुपर्ने बताउँदै नेपाली कांग्रेसमा यस्तो हालत हुन नदिनका लागि सक्षम, योग्य र इमान्दार व्यक्तिलाई नेतृत्वमा पठाउन आवश्यक रहेको बताए ।
ओलीको दम्भका कारण नेकपा एमाले फुटेर अर्को पार्टीको निर्माण भएकोले नेपाली कांग्रेसको १४ औं महाधिवेशनबाट सबै तहमा फुटको राजनीति नगरी एकताबाट नेतृत्व चयन गर्दै कांग्रेसको जिम्मेवारी सुम्पिने समेत उनले बताए ।
एकजुट भएर कांग्रेसका लाग्नुपर्ने र कांग्रेस बनाउनतर्फ सबै अग्रसर भएर अगाडी बढ्नुपर्ने उनले बताउँदै कांग्रेस जस्तो लोकतान्त्रिक पार्टी मुलुकमै नभएकोले देशको निकास निकाल्न नेपाली कांग्रेस नेतृत्व सरकारले नै भूमिका खेल्ने बताए ।
कार्यक्रममा नवनिर्वाचितहरुलाई बधाई तथा सफल कार्यकालको शुभकामना दिदै उनले मुलुकमै सबैभन्दा बढी क्रियाशिल सदस्यता इनरुवा–२ मा भएकोले युवाहरुले परिर्वतन यसै वडाबाट सुरुवात गर्नुपर्नेमा उनले जोड दिएका थिए । कांग्रेसको जिम्मेवारी युवाहरुको काँधमा आएकोले अगामीको पाठ सिक्दै फुटको होइन जुटको राजनीति गर्न सबैलाई आग्रह समेत गरे ।
