इनरुवा । कोरोना कहरको सुरुआतसँगै बन्द रहेको महत्वपूर्ण नाका मध्येको सुनसरीको भाण्टाबारी नाका अन्ततः खुलेको छ ।
नेपाल सरकारको २०७८ असोज ५ गतेको निर्णयले सो नाका खुले पनि लिखित रुपमा सम्बन्धित कार्यालयमा पत्र नआइसकेको कारण खुल्न सकेको थिएन भने २०७८ आश्वि १३ गते नेपाल सरकारले लिखित रुपमा सूचना जारी गरेपछि अन्ततः सुनसरीको महत्वपूर्ण नाकाको रुपमा चिनिएको भाण्टाबारी नाका खुलेको हो ।
कोरोना कहर सुरु भएपछि २०७६ चैत्र ११ गतेबाट सो नाका बन्द गरिएको थियो । कोरोनाको दोस्रो लहर सुरु हुनुभन्दा अगाडि केही समयको लागि भान्टाबारी नाका खुले पनि पुनः बन्द गर्नु परेको थियो । अन्ततः व्यापारिक दृष्टिकोणले महत्वपूर्ण मानिएको अन्तर्राष्ट्रिय भान्टाबारी नाका नेपाल सरकारको असोज १३ गतेको पत्रबाट पुनः सुचारु गरिएको जिल्ला प्रशासन कार्यालय सुनसरीले जनाएको छ ।
सशस्त्र प्रहरी बल ४ नं. गणका सशस्त्र प्रहरी उपरीक्षक माधव पौडेलले सरकारको निर्णयअनुसार बिहीबारबाट सो नाका पूर्ण रुपमा सुचारु भएको बताएका छन् ।
