हरिनगर । सुनसरीको हरिनगर गाउँपालिका स्थित बालकृष्ण माविमा निःशुल्क स्वास्थ्य शिविर सम्पन्न भएको छ । हरिनगर गाउँपालिका र ओम वेलनेस हस्पिटल बिराटनगरको संयुक्त आयोजनामा एक दिने निःशुल्क स्वास्थ्य शिविर शनिवार सम्पन्न भएको हो ।
सो स्वास्थ्य शिविरमा ६० जनाले सेवा पाएका थिए ।
निःशुल्क स्वास्थ्य शिविरमा प्राकृतिक प्रविधिबाट उपचार गरिएको थियो । औषधीको प्रयोग बिना नै उपचार गरिएको आयोजकले जनाएको छ । शिविरमा मधुमेह(चिनी रोग),उच्चरक्तचाप(प्रेसर),थाइराइड,तथा पारालाईसिस र नशा सम्वन्धिका बिरामीहरुलाई बिना औषधी उपचार गरिएको थियो ।
हरिनगर गाउँपालिकाका अध्यक्ष गफार अन्सारीले निःशुल्क स्वास्थ्य शिविरको उद्घाटन गर्दै उनले नयाँ प्रविधिबाट उपचार गरिने भएकोले यस शिविर लाभ लिनका लागि अनुरोध गरेका थिए । प्राकृतिक प्रविधिबाट उपचार गर्दा रकम बचत हुने र व्यक्तिको आयु बढ्ने भएकाले यस शिविरले
सर्वसाधारणहरुलाई फाइदा पुग्ने समेत उनले बताए । यस अस्पतालले बिना औषधीबाट उपचार गर्ने भएको हुदाँ प्रविधिबाट गरिने उपचारले बिरामीहरु निको हुने विश्वास समेत उनले व्यक्त गरे । यस क्षेत्रका सर्वसाधारणहरुलाई बढी मधुमेह(चिनी रोग),उच्चरक्तचाप(प्रेसर), थाइराइड, तथा पारालाईसिस र नशा सम्वन्धी समस्याले ग्रसित हुने गरेकोले समस्यालाई न्युनीकरण गर्नका लागि निःशुल्क स्वास्थ्य शिविरको आयोजनामा गरिएको अध्यक्ष अन्सारीको भनाई छ ।
ओम वेलनेस हस्पिटल बिराटनगरकी अध्यक्ष अन्जु उपाध्यायले हरिनगर गाउँपालिकाको सिफारिसमा यस क्षेत्रका बिरामीहरुलाई ५० प्रतिशत छुट दिइने समेत बताईन् । पालिकासँगको सहकार्य गरेकोले यस क्षेत्रका बिरामीहरुलाई बिशेष प्राथमिकताका उपचार गर्ने समेत उनले बताईन् । प्राकृतिक प्रविधिबाट उपचारले धेरै बिरामी निको भएको दाबी समेत उनले गरेकी छिन् ।
