इनरुवा । नेपाली कांग्रेसको १४ औं महाधिवेशन अन्र्तगत भोक्राहा नरसिंह गाउँपालिकाको सभापति पदका लागि उम्मेदवारी मनोनयन दर्ता गरेका तीन जना मध्ये एकको उम्मेदवारी खारेज भएको छ । निर्वाचन कार्यतालिका अनुसार गत असोज ८ गते नेपाली कांग्रेस भोक्राहा नरसिंह गाउँपालिकाको सभापति पदमा तीन जनाले मनोनयन दर्ता गरेका थिए ।
भोक्राहा नरसिंहको सभापति पदमा युवराज दाहाल, देव नारायण महतो र राजेन्द्र प्रसाद मेहताले मनोनयन दर्ता गरेका थिए । असोज ८ गते नै मनोनयन दर्ता भएपछि दावी विरोधको समयमा सभापति पदमा राजेन्द्र प्रसाद मेहताविरुद्ध उजुरी परेको थियो । असोज ९ गते हुने भनिएको पालिका निर्वाचन विवाद भएपछि स्थगित भएको थियो ।
नेपाली कांग्रेस सुनसरी निर्वाचन अधिकृत उत्तम पौडेलले विवाद उत्पन्न भएपछि निर्वाचन अनिश्चितका लागि सूचना प्रकाशित गरेर स्थगित गरेका थिए । सभापति पदका उम्मेदवार मेहता विरुद्ध उजुरी परेपछि निर्वाचन अधिकृत पौडेलले केन्द्रीय निर्वाचन समितिलाई विवादका बारेमा लिखित जानकारी गराएका थिए । विवाद समाधान गर्नका लागि केन्द्रमा पठाएको उजुरी उपर छानविन भई सभापति पदका उम्मेदवार मेहता सहित अन्य तीनजनाको उम्मेदवारी खारेज गरेको छ । जसमा ममता कुमारी उराँव र सराजुद्धिन मंसुरीको समेत उम्मेदवारी खारेज गरिएको छ ।
उनीहरुलाई भोक्राहा नरसिंह गाउँपालिकाको गत स्थानीय तहको निर्वाचन २०७४ मा पार्टीको अधिकारीक उम्मेदवारका विरुद्ध बिभिन्न पदमा उम्मेदवार भएका तथा त्यसका समर्थक र प्रस्तावकहरुलाई नेपाली कांग्रेसको विधान बमोजिम स्वतः अनुशासनको कारवाहीमा परेको हुदाँ पार्टीको विद्यान, नियमावली र निर्वाचन निर्देशिका बमोजिम उम्मेदवारी खारेज गरिएको नेपाली कांग्रेस केन्द्रीय निर्वाचन समितिले जनाएको छ । नेपाली कांग्रेस केन्द्रीय निर्वाचन समितिको असोज १७ बसेको बैठकले तीन जनाको उम्मेदवारी खारेज भएको निर्णय गरेको हो । नेपाली कांग्रेस केन्द्रीय निर्वाचन समितिका सचिव जगन्नाथ श्रेष्ठद्वारा हस्ताक्षरित सुचनामा तीनजनाको उम्मेदवारी खारेज गरिएको उल्लेख गरिएको छ ।
भोक्राहा नरसिंह गाउँपालिकामा सभापति पदमा दुुई जनाबीच कडा प्रतिस्पर्धा हुने भएको छ । सभापति पदमा युवराज दाहाल र देवनारायण महतोबीच चुनावी प्रतिस्पर्धा हुने पक्कापक्की भएको छ । नेपाली कांग्रेस केन्द्रीय निर्वाचन समितिले उम्मेदवारी खारेज गरेपछि विवाद साम्य भएको बुझिएको छ । अब नेपाली कांग्रेस सुनसरीका अगुवा नेताहरुको बैठकबाट निर्वाचनको मिति तय गरिने भएको छ । भोक्राहा नरसिंहमा निर्वाचनको मिति तय भएपछि निर्वाचन प्रक्रिया अगाडी बढाउने बुझिएको छ ।
नेपाली कांग्रेस सुनसरीका निर्वाचन अधिकृत पौडेलले नेपाली कांग्रेस सुनसरीका सभापति राजीव कोइरालाको नेतृत्वमा बस्ने बैठकले निर्वाचनको मिति टुङ्गो लगाएपछि निर्वाचन हुने बताएका छन् । सुनसरी काँग्रेसका सभापति राजीव कोइरालाले कोशी गाउँपालिकाका अध्यक्ष तथा निर्वाचन क्षेत्र नं.४का क्षेत्रिय सभापति अयुब अंसारी , हरिनगर गाउँपालिकाका अध्यक्ष गफार अंसारी , पूर्व महासमिति सदस्य जमिल अंसारी लगायतका अगुवा नेताहरुको बैठक समेत बस्ने तयारी गरेको विश्वस्तसुत्रले जनाएको छ ।
