अजय मण्डल
देवानगंज । सुनसरीको देवानगंज गाउँपालिका वडा नम्बर–३ का वडा अध्यक्ष अनिल प्रसाद भगतले अति विपन्न परिवारलाई ग्याँस चुल्हा सेट वितरणसँगै किसानहरुmलाई कीटनाशक औषधी छर्ने स्प्रे मेसिन वितरण गरेका छन् । देवानगंज–३ का एक सय किसानलाई किटनाशक औषधी छर्ने स्प्रे मेसिन र एक सय ६० अति विपन्न परिवारहरुलाई ग्याँस चुल्हो सेट वितरण गरेको हो ।
हिन्दूहरूको महान चाड पर्व दीपावली तथा छठ पर्व को उपलक्ष्यमा किसान तथा अति बिपन्न परिवारहरुलाई देवानगंज–३ का वडाध्यक्ष भगतले शुभकामना व्यक्त गर्दै समाग्रीहरु हस्तान्तरण गरेका हुन् । देवानगंज–३ का वडाध्यक्ष अनिल प्रसाद भगतले वडाबासीको लागि सेवा गर्दै आएकोले किसान र अति विपन्न परिवारका लागि समाग्री वितरण गरिएको बताए ।
वडामा बढी किसान भएकाले उनीहरुलाई कृषि क्षेत्रमा काम गर्न सहज हुने उद्देश्यले तत्काल किटनाशक औषधी छर्ने मेसिन उपलब्ध गराएको उनले बताउँदै अति विपन्न परिवारलाई खाना पकाउन समस्या भइरहेकोले ग्याँस चुल्हो सेट उपलब्ध गराएकोले उनीहरुले आ–आफना परिवारलाई समयमा खाना पकाएर खान सक्ने र समयको बचत हुने भएकाले समाग्री वितरण गरिएको उनको भनाई छ ।
केही दिन अघि आएको बाढीले सर्वसाधारणहरुको घर डुबानमा परेकोले दाउराबाट खाना बनाउन समस्या भएको हुदाँ वडाबासीका अति विपन्न परिवारलाई छनौट गरी ग्याँस चुल्हा सेट उपलब्ध गराएको उनको कथन छ ।
उनका अनुसार आगामी दिनमा पनि किसानहरूको सेवामा समर्पित रहनेछु । वडाबासीलाई सेवा सुविधा समयमा प्रदान गर्दै आएकोले कुनै किसिमको समस्या आउन नदिन आफु जनताकै काममा सक्रिय रहेको वडाध्यक्ष भगतको भनाई छ ।
उक्त वडाका प्रमिला देवी शर्माका अनुसार ग्याँस चुल्हा सेट पाएपछि निकै खुशी लागेको छ । सोही वडाका महेश मेहताले वडाध्यक्ष सदैव दुःख सुखमा साथ सहयोग गर्दै आएकोले यस्तो परिस्थितीमा समाग्री वितरण गरेको हुदाँ खुशी भएको बताए ।
