इनरुवा । सुनसरीको इनरुवा नगरपालिका–९ बवियाका स्थानीय बासीहरुले मंगलवार सडक अवरुद्ध गरेका छन् । सुनसरीको इनरुवादेखी कप्तानगंज जोडने मुल सडकको बवियामा स्थानीयबासीहरुले दिनभर सडक अवरुद्ध गरेका हुन् ।
इनरुवा नगरपालिका–९ बवियाको मुलसडकको पानी नपटाउँदा सर्वसाधारणहरु धुलो खान बाध्य भएको भन्दै बाटो अवरुद्ध गरेको बताएका छन् ।
इनरुवा नगरपालिकाको बवियाको बजारतिर पानी टयांकीले पानी पटाउने भएपनि बवियाको शुक्रवारे हाटतिर पानी नहाल्दा धुलो खान बाध्य भएकोले मंगलवार दिनभर बाटो अवरुद्ध गरेको इनरुवा–९ बवियाका नारायण शर्माले बताए ।
इनरुवा–९ बवियाको बाटोमा पानी हाल्न बारम्बार अनुरोध गरेपनि यस बाटोमा पानी नहालेकोले बालबालिका सहित बृद्धबृद्धाहरु बिरामी पर्ने गरेको र एक जनाको मृत्यु समेत भएको उनले बताए ।
बवियामा लामो समयदेखी बाटो बन्न नसकेको कारण स्थानीयबासीहरु धुलोबाट ग्रसित भएकोले बिरामीको संख्या बढ्दै गएको र स्वास्थ्यमा पनि असर देखा पर्न थालेको हुदाँ वडा कार्यालय र नगरपालिकाले कुनै वास्ता नगरेकोले बाध्य भएर सडक अवरुद्ध गरेको स्थानीयहरु बताउँछन् ।
इनरुवा नगरपालिका–९ का वडाध्यक्ष बसिरमुद्धिन मंसुरीले पानी पटाउने कार्य बवियाको शुक्रवारे हाटदेखी नै सुरु गर्ने बताए । प्रत्येक दिन २ पटक सो
बाटोमा पानी पटाउनका लागि पानी टयांकीका चालक तथ सहचालकलाई भनिएको उनले बताउँदै अवदेखी प्रत्येक बाटोमा पानी हाल्ने कार्यलाई निरन्तरता दिने समेत बताए ।
जनता सडकको धुलो खान वाक्क भइसकेको हुदाँ सडक अवरुद्ध गर्न बाध्य भएको उनले बताए । संचारकर्मीहरुसँग कुराकानी गर्दै उनले आफुले पहल तथा प्रयास गरिरहेको भएपनि समयमा पानी पटाउने कार्य नभएको हुदाँ अबको दिनदेखी बबियाको शुक्रवारे हाटलाई बिशेष प्राथमिकता दिई पानी छर्ने काम हुने बताए ।
