इनरुवा । सुनसरीको भोक्राहा नरसिंह गाउँपालिकामा अख्तियार दुरुपयोग अनुसन्धान आयोगले
गत आर्थिक वर्ष २०७६\०७७ र २०७७\०७८ मा भएका कामहरुको सम्पुर्ण फाइलहरु कब्जामा लिएको छ ।
अख्तियार दुरुपयोग अनुसन्धान आयोगको टोलीले भोक्राहा नरसिंह गाउँपालिकामा छापा मारी गत आर्थिक वर्षको कागजात र फाइलहरु कब्जामा लिएको हो । आयोगमा उजुरी परेको आधारमा सो टोलीले अचानक आएर छापा मारी सबै कागजात र फाइलहरु कब्जामा लिई अनुसन्धान सुरु गरेको छ ।
आयोगले २० वटा शिर्षकहरुमा छानविन र अनुसन्धान सुरु गरेको छ । गत आर्थिक वर्षमा सम्पन्न भएका योजनाहरुमा अनियमितता भएको भन्दै स्थानीवासीहरुले उजुरी दिएपछि आयोगको टोलीले पालिकाको सबै कागजात र फाइलहरु कब्जा लिँदै अनुसन्धान सुरु गरिएको समाचार श्रोतले जनाएको छ ।
गत आर्थिक वर्ष २०७६\०७७ र २०७७\०७८ सम्पन्न भएको योजनाहरुलाई केन्द्रीत गर्दै आयोगले स्थलगत निरीक्षण गर्दै अनुसन्धान गरिरहेको श्रोतले जनाएको छ ।
निर्माण भएको सडक बाटो, निर्माणाधीन अधुरो बाटो र योजनाहरु, शिक्षा, स्वास्थ्य, कृषि लगायतका सबै विषयगत शाखाहरुले गरेका कामहरुको कागजात र फाइलहरु कब्जा गरी अनुसन्धान सुरु गरिएको अख्तियारका प्रवक्ता नारायण प्रसाद रिसालले बताए ।
अख्तियारका प्रवक्ता रिसालका अनुसार भोक्राहा नरसिंह गाउँपालिकाको सम्पुर्ण कागजातहरु कब्जामा लिएको र स्थलगत निरीक्षण गरी प्रतिवेदन आयोगमा पेश गरेपछि थप निर्णय गर्नेछ ।
आयोगमा खरिद र निर्माण सामाग्री तथा विकास परियोजनामा अनियमितता गरेको उजुरीको अधारमा छापा मारेर कागजात तथा फाइलहरु नियन्त्रणमा लिई अनुसन्धान पुरा नभएसम्म टोलीले कार्य गर्ने प्रवक्ता रिसालले सुनसरी अनलाइनको कुराकानीमा बताए ।
अख्तियार दुरुपयोग अनुसन्धान आयोगमा सबैभन्दा बढी उजुरी परेको आधारमा स्थानीय तहहरुमा अनुसन्धान थालनी गरिएको प्रवक्ता रिसालले जानकारी दिए ।
भोक्राहा नरसिंह गाउँपालिकालाई पनि प्राथमिकतामा राखेर आयोगको बिशेष टोलीलाई परिचालन गरिएको उनले बताए । प्रतिवेदनको आधारमा आयोगले थप निर्णय गर्नेछ उनले भने,‘अनुसन्धानबाट कार्वाही प्रक्रिया अगाडी बढाउने छु । अनियमितता गर्ने जोसुकैलाई कार्वाही हुनेछ ।
गत आर्थिक वर्ष २०७६\०७७ र २०७७\०७८ मा भोक्राहा नरसिंह गाउँपालिकाको परिषदबाट विनियोजित कार्यक्रमहरु लगायतका २० वटा योजनाहरुमाथि आयोगले छानविन सुरु गरिएको बुझिएको छ ।
