इनरुवा । नेपाली कांग्रेसको १४ औं महाधिवेशन अन्र्तगत नेपाली कांग्रेसको सुनसरीको अधिवेशन सम्पन्न भएपनि पालिका स्तरीयको मतगणना रोकिएको छ ।
नेपाली कांग्रेस सुनसरीको अधिवेशनबाट नयाँ नेतृत्व चयन गर्नका लागि सम्पन्न भएको दुई हप्ता बित्न लाग्दा समेत रोकिएको मतगणना सुरु हुन सकेको छैन् । नयाँ नेतृत्वका लागि सुनसरी कांग्रेसमा पदाधिकारीहरु चयन भएपनि पालिका स्तरीयको मतगणना हुन सकेको छैन् ।
नेपाली कांग्रेस सुनसरीका उपसभापति पदका उम्मेदवार गफार अन्सारी र सचिव पदका उम्मेदवार रन्जेश भट्टराईले पुनः मतगणना गर्न निवेदन दिएपछि पालिका स्तरीय सदस्यहरुको मतगणना रोकिएको थियो । १२ स्थानीय तहबाट उम्मेदवारहरुले मतगणना गर्न जोड दिएका छन् । जिल्लाको पदाधिकारी सहित सदस्यहरुकोे नतिजा आइसकेको हुनाले पालिका स्तरीय सदस्यहरुको पनि मतगणना गर्न उनीहरुले जोड दिएका छन् ।
नेपाली कांग्रेसको केन्द्रीय महाधिवेशन पनि सम्पन्न भइसकेको हुनाले सुनसरी कांग्रेसको पालिका स्तरीयको मतगणना चाडो भन्दा चाडो सुरु गर्न जोड दिएका हुन् । नेपाली कांग्रेस सुनसरीका उपसभापति पदका उम्मेदवार अन्सारी र सचिव भट्टराईसँग सहमति र सहकार्य गरी जिल्लाका नयाँ नेतृत्वकर्ताहरुले भुमिका निर्वाह गर्नका लागि पालिका स्तरीय सदस्य पदका उम्मेदवारहरुले जोड दिदै बाँकी रहेको मतगणना सुरु गर्नका लागि दबाब सिर्जना गर्न थालेका हुन् ।
सुनसरी कांग्रेसका मतदाताहरुले पालिका स्तरीय सदस्यहरुको नतिजाको पर्खाइमा बसिरहेका छन् । उनीहरुले बाँकी मतगणना गर्नका लागि जिल्लाका नेतृत्वकर्ताहरुले भुमिका निर्वाह गर्नुपर्ने बताउँछन् । कांग्रेसको केन्द्रीय महाधिवेशन पनि सम्पन्न भइसकेको हुदाँ जिल्ला नेतृत्वकर्ताहरु मौन बसेको पालिकाका उम्मेदवारहरुको ठम्याई रहेको छ । नेपाली कांग्रेस जिल्ला पार्टी कार्यालय सुनसरीमा मतपेटिकाहरु सिल गरिएर राखिएको छ । नेपाली कांग्रेस सुनसरीको बाँकी गणना कहिले होला ? भन्ने बिषयमा मतदाताहरु चिन्तित बनेका छन् । जिल्लाका नेतृत्वकर्ताहरु चुपचाप बसेकाले पालिका स्तरीयका उम्मेदवार सहित मतदाताहरु नतिजाको पखाईमा बसेका छन् ।
नेपाली कांग्रेस सुनसरीका उपसभापति पदका उम्मेदवार गफार अन्सारीले सहमतिको प्रयास जारी रहेको हुदाँ ठोस निर्णय गरेर मतगणना गर्न सुरु गर्ने बताए । अहिले आफु काठमाण्डौं रहेको र सुनसरी आउने बितिकै यस बिषयमा छलफल र सहमति गरेर मतगणना गर्ने बिषयमा अगाडी बढ्ने उनले बताए ।
नेपाली कांग्रेस सुनसरीका सचिव पदका उम्मेदवार रन्जेश भट्टराईले पुनः मतगणना गर्ने विषयमा छलफल भइरहेको बताए । उनले भने, ‘म टिमबाट चुनाव लडेको थिए । आफनो टिममा पनि यस बिषयमा बहस र छलफल भइरहेको छ । टिमको निर्णय आउने बितिकै मतगणना सुरु हुनेछ ।
यता नेपाली कांग्रेस सुनसरीका सभापति केदार भण्डारीले सहमतिको प्रयास जारी रहेको बताए । केन्द्रीय महाधिवेशनको लागि आफु पनि काठमाण्डौं रहेकोले सुनसरी आउने बितिकै अन्सारी र भट्टराईसँग सहमति गरेर मतगणनाको प्रक्रिया अगाडी बढाउने बताए ।
नेपाली कांग्रेस सुनसरीका सचिव बिरेन्द्र साहले पुनः मतगणना गर्नका लागि दुई जना उम्मेदवारहरुसँग छलफल र सहमति गरेर दुई–तिन भित्र केही निचोड निकालेर बाँकी रहेको मतगणनालाई निरन्तरता दिने बताए ।
नेपाली कांग्रेस सुनसरीका मतदाता र उम्मेदवारहरुलाई नआतिनका लागि अनुरोध गर्दै सचिव साहले सहमतिबाट समस्याको समाधान गर्ने र दुई–तिनभित्र मतगणना सुरु गर्ने बताए । पालिका स्तरीयको मतगणना गर्न मात्र बाँकी रहेकोले निवेदन दिएका उम्मेदवारहरुसँग छलफल गरी निष्कर्ष निकाल्ने उनले प्रतिवद्धता व्यक्त गरे ।
