इनरुवा। सुनसरीको भोक्राहा गाउँपालिकामा बेमौसमी बर्षा पछि आएको बाढि र डुबानबाट प्रभावित परिवारलाई सहारा नेपालले राहत वितरण गरेको छ । बिहिबार भोक्राहा गाउँपालिकाका विभिन्न वडाका बाढि तथा डुबान प्रभावित पाँच सय ८५ परिवारलाई खाद्यान्न सामाग्री सहित अन्य सामाग्रीहरु वितरण गरिएको हो ।
भोक्राहा गाउँपालिकाकी उपाध्यक्ष पुनम कुमारी महताले पिडित परिवारलाई राहत सामाग्री वितरण गर्नुभएको थियो । उहाँले विभिन्न वडामा पुगेर सामाग्री वितरण गर्नुका साथै अनुगमन पनि गर्नुभएको थियो ।
बाढि तथा डुवानबाट पिडित भएका परिवारलाई सामाग्री वितरण गर्दै उपाध्यक्ष पुनम कुमारी मेहताले विपतको समयमा राहत सामाग्रीले ठुलो सहयोग पुगेको बताउनुभयो । गाउँपालिकाले यस अघि वितरण गरिएको सामाग्री प्रयाप्त नभईरहेको अवस्थामा सहारा नेपालले खाद्य समाग्री प्रदान गर्दा थप सहयोग पुगेको उहाँले बताउनुभयो । यता, वडा नम्बर ७ का वडा अध्यक्ष रामचन्द्र यादवले बाढिको डुवानमा परी बिहान बेलुका दैनिक गुजारा गर्न गाह्रो परिरहेका परिवारलाई खाद्य सामाग्रीले ठुलो सहयोग पुग्ने बताउनुभयो ।
कात्तिको पहिलो साता आएको बेमौसमी बर्षाले भोक्राहा गाउँपालिकामा ठुलो क्षति पुर्याएको थियो । त्यसमा पनि विशेष गरी गाउँपािलकाको वडा नम्बर ४,५,७,८मा बढि क्षति पुगेको गाउँपालिकाले जनाएको छ ।गाउँपालिकाले नै उपलब्ध गराएको विवरणका आधारमा बाढि प्रभावित सोही वडामा पुगेर सहारा नेपालले खाद्यान्न सामाग्री वितरण गरेको हो । एक्सन एगेन्स्ट् हंगर नामक संस्थाको आर्थिक सहयोगमा गाउँपालिकाको सहकार्यमा सहारा नेपालले राहत सामाग्री वितरण गरेको हो ।
बाढि तथा डुवानबाट प्रभावित भएका प्रति परिवारलाई २५ के.जी चामल, १० के.जी दाल, २ के.जी चिनी,२ लिटर तेल, २ के.जी गेडागुडी,नुन,साबुन,बाल्टी,क्लोरिन झोल लगायतका सामाग्रीहरु वितरण गरिएको सहारा नेपालका उपाध्यक्ष सोमनाथ तिम्सिना जानकारी दिनुभयो ।
विपतको समयमा प्रभावितहरुका लागि बाढि प्रतिकार्यात्मक परियोजना अनुसार पिडित परिवारलाई राहत सामाग्री वितरण गरिएको सहारा नेपालका कोषाध्यक्ष श्याम कुमार प्रधानले जानकारी दिनुभयो । यस परियोजनाले यस अघि पनि अन्य क्षेत्रमा राहत वितरण गर्दै आएको उहाँको भनाई थियो ।
राहत सामाग्री पाएका स्थानियहरुले भने खुसी व्यक्त गरेका छन् । भोक्राहा गाउँपालिका ७ की ममता यादवले बाढिले खानेकुरा सबै बगाएको बताउनुभयो । राहतमा पाएको खाद्य समाग्रीले ठुलो सहयोग पुगेको उहाँले बताउनुभयो ।
