भण्टाबारी । मकुना हात्तीको मृत्युपछि रोकिने अपेक्षा गरिएको हात्ती आतंक पुनः सुरु भएको छ । कोसी टप्पु वन्यजन्तु आरक्षबाट निस्केर आउने हात्ती समूहले पुनः आतंक मच्चाउन थालेको छ । यसैक्रममा कोसी टप्पु वन्यजन्तु आरक्षबाट सोमबार मध्यरातमा गाउँ पसेको हात्तीको समूहले कोसी गाउँपालीका ८ भण्टाबारीस्थित रेल्वे टोलका तीनजनाको घरमा क्षति पु¥याएको छ । हात्तीले स्थानीय बिन्दा सरदार, हलेसर सरदार र शिबु सरदारको घरमा तोडफोड गर्दै भण्डारण गरी राखिएको अन्नपात खाएर नष्ट गरिदिएको स्थानीय प्रत्यक्षदर्शीले जानकारी दिए ।
रातको समयमा सुतिरहेको अवस्थामा आएको हात्तीको समूहले घर तोडफोड गर्न थालेपछि ज्यान जोगाएर भाग्न सफल भएको बताउदै हात्ती पीडित हलेसर सरदारले भर्खरै भित्र्याएको गहुँसँगै चामल र धान भने खाएर हात्तीले नष्ट गरिदिएको दुखेसो पोखे । पटकपटक गाउँ पसेर हात्तीको समूहले भौतिकसँगै मानवीय क्षति गर्दै आएपनि सम्बन्धित निकायले हात्ती रोकथाम गर्न तदारुकता नदेखाएको उनले गुनासो गरे ।
यसैबीच हात्ती आतंक रोक्न माग गर्दै स्थानीयले कोसी गाउँपालीका ८ भण्टाबारीस्थित पूर्व पश्चिम लोकमार्ग अवरुद्ध गरेका छन् । दिनहुँजसो गाउँ पसेर हात्तीको समूहले आतंक मच्चाउन थालेपछि आजित भएका स्थानीयबासीले हात्ती आतंक तत्काल रोक्न माग गर्दै मंगलबार बिहानै पूर्व पश्चिम लोकमार्ग अवरुद्ध गरेका थिए ।
पीडित पक्षलाई तत्काल क्षतिपूर्ति र हात्ती आतंक रोक्न थप सक्रियता बढाउने कोसी टप्पु आरक्ष प्रशासन र आन्दोलित स्थानीयबीच सहमति भएपछि अवरुद्ध लोकमार्ग करिब एक घण्टापछि खोलिएको थियो । हात्ती आतंक बढेपनि सम्बन्धित निकायलाई पटकपटक ध्यानाकर्षण गराउदा समेत सुनुवाइ नभएपछि दबाब दिने अभिप्रायले बाटो अवरुद्ध गरिएको स्थानीय फुलेश्वर कामैतले बताए । आफूहरूलाई क्षतिपूर्ति भन्दा पनि हात्ती आतंक सदाका लागि रोकिनुपर्ने पीडितहरुको माग छ ।
वर्षौंदेखि हात्ती आतंक यथावत रहेपनि रोकथामका लागि आरक्ष प्रशासन गम्भीर नबनेको स्थानीयको गुनासो छ । हात्ती पीडित पक्षले सम्बन्धित निकायलाई गुहार गर्दै थाकिसकेको बताउदै कोसी गाउँपालीकाका अध्यक्ष ऐयुब अन्सारीले उनीहरूको माग जायज भएपनि माग पूरा गराउने तरिका सहि नभएको बताउँछन् । वर्षौदेखि हात्तीबाट सर्वसाधारण आतंकित छन् उनले भने यसर्थ हात्ती आतंक रोक्नुपर्छ भन्ने माग जायज हो तर बाटो अवरुद्ध वा चक्काजाम गरेर समस्या समाधान हुँदैन ।
समस्या समाधानका लागि सम्बन्धित पक्ष गम्भीर हुनुपर्छ स्थानीय तहबाट गर्नुपर्ने वा हुनसक्ने सहयोग ÷सहकार्य गर्न तयार छौं अध्यक्ष अन्सारीले भने । माग सम्बोधन नभएको अवस्थामा आफूहरू थप आन्दोलनका कार्यक्रम घोषणा गर्दै चरणबद्ध आन्दोलनमा उत्रिन बाध्य हुने पीडित स्थानीयले चेतावनीसमेत दिएका छन् ।
