इनरुवा । सुनसरीको भोक्राहा नरसिंह गाउँपालिकामा आउँदो पुस ९ गतदेखी ११ गतेसम्म परिवार नियोजन बन्ध्याकरण शिविर सुरु हुने भएको छ ।
भोक्राहा नरसिंह गाउँपालिकाको स्वास्थ्य शाखाको संयोजन र स्वास्थ्य कार्यालय सुनसरीको आयोजनामा पुस ९ गतेदेखी ११ गतेसम्म घुम्ति शिविर हुने भएको हो ।
भोक्राहा नरसिंह गाउँपालिकाभित्र रहेका महिला स्वास्थ्य स्वंय सेविकाहरुलाई परिवार नियोजन बन्ध्याकरण सम्वन्धी अन्तरक्रिया कार्यक्रम मार्फत जानकारी गराउँदै घुम्ति शिविरमा महिला र पुरुषहरुलाई सहभागिताको लागि भुमिका खेल्नुपर्नेमा जोड दिएको थियो ।
पालिकाका महिला स्वास्थ्य स्वंयसेविकाहरुको सहभागितामा एक दिने अन्तरक्रिया कार्यक्रम मंगलवार सम्पन्न भएको छ ।
भोक्राहा नरसिंह गाउँपालिकाका स्वास्थ्य शाखाका प्रमुख आलम अन्सारीले घुम्ति शिविर सम्पन्न गराउनका लागि महिला स्वास्थ्य स्वंयसेविकाहरुको भुमिका अपरिहार्य रहेकोले परिवार नियोजन सम्वन्धी जानकारी गराएको बताए ।
स्वास्थ्य शाखाका प्रमुख अन्सारीले सन्तानका रहर पुगिसकेका र ईच्छुक महिलाको लागि स्थायी बन्ध्याकरण(मिनिल्याप) र पुरुषहरुको लागि भ्यासेक्टोमी साथै लामो समयको जन्मान्तरको लागि ईम्प्लाण्ट आईयुसिडि समेतको घुम्ति शिविरबाट सेवा प्रवाह गर्ने बताए ।
पालिकाभित्र परिवार नियोजन गराउन चाहने महिला तथा पुरुषहरुले पुस ९ गतेदेखी ११ गतेसम्म स्वास्थ्य चौकी भोक्राहाबाट सेवा लिन सर्वसाधारणहरुलाई आग्रह समेत गरेका छन् । कार्यक्रममा मेरीस्टोपका केन्द्रीय डिपिटी डाइरेक्टर, जिल्ला स्वास्थ्य कार्यालय सुनसरीका परिवार नियोजन अधिकृत शेरबहादुर कालिकोटेले महिला स्वास्थ्य स्वंयसेविकाहरुलाई प्रशिक्षण दिएका थिए ।
कार्यक्रममा पालिकाको ८ वटै वडाका महिला स्वास्थ्य स्वंयसेविकाहरु, जनप्रतिनिधिहरु, धामी झाँक्री, स्वास्थ्य चौकीका व्यवस्थापन समितिका पदाधिकारीहरु, समाजसेवी र संचारकर्मीहरु लगायतको सहभागिता रहेको थियो ।
