इनरुवा । सुनसरीको लौकहीबाट अटोमेटिक हतियार सहित दुई भारतीय युवा पक्राउ परेका छन ।
विशेष सूचनाको अधारमा सुनसरी प्रहरीले उनीहरुलाई सुनसरीको कोशी गाउँपालिका–१ स्थित लौकही बजारमा रहेको बि.एस.होटलबाट पक्राउ गरेको हो ।
पक्राउ पर्नेमा भारत बिहार राज्यको अररिया जिल्ला बसमतिया २ बस्ने २४ वर्षिय हासिम अन्सारी र बसमतिया ६ घर भएका वर्ष ३५ का विद्यानन्द राम रहेका छन । पक्राउ परेकाहरुको साथबाट प्रहरीले २ थान अटोमेटिक पेस्तोल, सोमा लाग्ने ३ राउण्ड गोली र ४ थान म्यागजिन बरामद गरेको छ ।
बरामद हतियार सहित पक्राउ परेका भारतीय नागरिकलाई जिल्ला प्रहरी कार्यालय सुनसरीले पत्रकार सम्मेलन गरी मंगलवार सार्वजनिक गरेको छ ।
बीआर५०के÷०१४९ नम्बर प्लेटको सुपर स्पेलेन्डर मोटरसाइकल समेत बरामद गरिएको सुनसरी प्रहरीले जनाएको छ । सुनसरीका प्रहरी प्रमुख सञ्जय सिंह थापाले हतियार कारोबारको विषयमा थप अनुसन्धान अघि बढाइएको बताए ।
सुनसरीका प्रहरी प्रमुख थापाले हतियार सहित पक्राउ परेका भारतीय नागरिकको हकमा जिल्ला अदालत सुनसरीबाट ७ दिन म्याद थप गरि हातहतियार तथा खरखजाना मुद्दामा कार्वाहीको प्रकृया अघि बढाइएको बताए ।
