इनरुवा । नेपाली कांग्रेस इटहरी उपमहानगरपालिकाको आयोजनामा एक दिने प्रशिक्षण कार्यक्रम आइतवार सोमवार सम्पन्न गरेको छ । नेपाली कांग्रेसको १४ औं अधिवेशन सम्पन्न भएलगतै नेपाली कांग्रेसले आ–आफना पालिकाका नेता तथा कार्यकर्ताहरुलाई प्रशिक्षण कार्यक्रमलाई निरन्तरता दिदै इटहरी कांग्रेसले एक दिने कार्यक्रम सम्पन्न गरेको हो ।
नेपाली कांग्रेसको संशोधित विद्यान, पार्टीको सिद्धान्त र नीतिलाई कार्यान्यवयन गर्नका लागि कांग्रेसका नेता तथा कार्यकर्ताहरुलाई प्रशिक्षण मार्फत जानकारी गराउन थालेको हो । नेपाली कांग्रेस सुनसरीका सचिव बिरेन्द्र साहले इटहरी कांग्रेसका नेता तथा कार्यकर्ताहरुलाई प्रशिक्षण दिएका थिए ।
नेपाली कांग्रेसका नेता तथा कार्यकर्ताहरुलाई पार्टीको बारेमा जानकारी गराउन आवश्यक रहेको भन्दै इटहरी कांग्रेसले प्रशिक्षण कार्यक्रम दिएको बताइएको छ । नेपाली कांग्रेसलाई सुदृढिकरण गर्नका लागि र कांग्रेसको १४ औं महाधिवेशनको बेला एक आपसमा भएको मनमुटावलाई अन्त्य गर्नका लागि प्रशिक्षणले समेत मदत गरेको इटहरी कांग्रेसका सभापति हेमकर्ण पौडेलले बताए ।
नेपाली कांग्रेसलाई आगामी दिनमा मजबुत बनाउनका लागि र पार्टीको विद्यान बारेमा तल्लो तहका कार्यकर्ताहरुलाई जानकारी गराउने उद्देश्यले प्रशिक्षण कार्यक्रमको आयोजना गरिएको सभापति पौडेलले जानकारी दिए । प्रशिक्षण कार्यक्रमलाई बीच बीचमा निरन्तरता दिदै आगामी स्थानीय तहको निर्वाचनमा कांग्रेसलाई जिताउन आवश्यक रहेकोले मनमुटाव नगरी एकजुट भएर पार्टीको संगठनलाई बलियो बनाउनतर्फ सबैजना अग्रसर हुनुपर्ने सभापति पौडेलले बताए ।
नेपाली कांग्रेस सुनसरीका सचिव बिरेन्द्र साहले सुनसरीको १२४ वटा वडामा यसअघि कांग्रेका नेता तथा कार्यकर्ताहरुलाई प्रशिक्षण दिइसकेका थिए । कांग्रेसको १४ औं महाधिवेशनबाट आएका नयाँ नेतृत्वका पदाधिकारीहरुलाई पार्टीको विद्यानसँगै सिद्धान्तका बारेमा प्रशिक्षण दिएको सुनसरी कांग्रेसका सचिव साहले बताएका छन् ।
