गनेश कुमार यादव
इनरुवा । सुनसरीको इनरुवामा सहर्ष शंकर दुलालका जन्मोत्सवको अवसरमा निःशुल्क आँखा तथा स्त्रिरोग उपचार शिविर हुने भएको छ ।
इनरुवा–३ मा रहेको श्री जनता आधारभूत विद्यालयमा फागुन १९ गते बिहीवार निःशुल्क आँखा तथा स्त्रिरोग उपचार शिविर हुने भएको हो ।
इनरुवा नगरपालिका वडा नं–३ घर भएका र हाल अमेरिकामा बस्दै आएका डा.हरिबंश दुलालका जेष्ठ सुपुत्र सहर्ष शंकर दुलालको छैंठो जन्मोत्सवको अवसरमा सो निःशुल्क स्वास्थ्य शिविर हुन लागेको सार्थक प्रयासका अध्यक्ष उत्तम चाम्लिङ्ग राईले बताए ।
उक्त शिविरमा इनरुवाका करिव १ सय ५० जना विपन्न तथा गरिवलाई सेवा तथा निःशुल्क चश्मा समेत उपलब्ध गराउने राईले बताए । सार्थक प्रयासको आयोजना र डा.हरिबंश दुलालको आर्थिक सहयोगमा सो निःशुल्क स्वास्थ्य शिविर हुन लागेको राईले जानकारी दिए ।
उक्त शिविरमा इनरुवा अस्पताल,इटहरी आँखा अस्पतालको प्राविधिक सहयोग ,इनरुवा इभेन्ट म्यानेज्मेन्ट र हाम्रो सहयात्रा मंचको सहकार्यमा एक दिने निःशुल्क स्वास्थ्य शिविरको आयोजना हुन लागेको हो । सो शिविरबाट लाभ लिनका लागि इनरुवाबासी र आसपास गाउँपालिकाका सर्वसाधारणहरुलाई अनुरोध समेत गरिएको छ ।
हाल अमेरीकामा बस्दै आएका डा.हरिबंश दुलालले इनरुवाका विपन्न तथा गरिव परिवारहरुलाई समय समयमा आर्थिक सहयोग गर्दै आइरहेका छन् । केही दिन अगाडी उनले इनरुवाका तथा गरिव परिवारहरुलाइ न्यानो कपडा,ब्याङ्केट,जुत्ता ,चप्पल लगायतका सामाग्री उपलब्ध गराएका थिए । दुलाल आफु अमेरिकामा बस्दै आएपनि इनरुवाका जनताको सहयोग गर्दै आइरहेका छन् ।
